Kuminze umfana edamini

Kabelo Tlhabanelo

Umndeni kaReoletile Sejane, ubulindele ukubuya kwakhe umbone ngemuva kokuchitha isonto lonke esikhungweni sokugonqa ngawedwana kanye nabanye kulandela ukutholakala ukuthi une-Covid-19.

Kodwa ezinsukwini ezine ngaphambi kokuba umfana oneminyaka eyi-16 abuye ekhaya, uminze edamini eliseduze nendawo yesikhungo.

Okhulumela uMnyango wezeMpilo e-Free State, uMondli Mvambi, uthe uReoletile ofunda e-Le Reng Secondary School, kanye nomunye umfundi oyedwa banyonyobe badlula onogada bayobhukuda e-Sterkfontein Dam.

UMvambi uthe abafundi bebenganayo imvume ephuma kulesi sikhungo noma kubaphathi baso.

“Imibiko yokuqala ikhombisa ukuthi abafundi baqale ukubhukuda ngaphandle kokugadwa nokugunyazwa.”

Laba bafana ababili base-Manyatseng, bahlolwa batholwa ukuthi bane-Covid-19 ezinsukwini ezedlule.

Ubaba kaReoletile, uTeboho Sejane, ucele umfowabo uMohau Mokotjo, ukuba amkhulumele.

UMokotjo uthe: “Kube buhlungu ukuzwa ukuthi uminzile. Waya lapho ukuze athole impilo kodwa usebuya eseyisidumbu.

“Izingane zethu bezingagadiwe. Ngithukile ngesikhathi ubaba wakhe engitshela ukuthi uminzile.”

Uthe umndeni ulahlekelwe ngumuntu obehlakaniphe ngokwanele ukuthi angaphila futhi aphumelele empilweni.

“Umfana ubengakukhonzile nokubhukuda. Angazi ukuthi ungene kanjani kuleliya damu,” kusho yena.

“Besilindele ngabomvu ukuba naye ekhaya ngoLwesine.”

I-Scrolla.Africa ayikwazanga ukuthola okhulumela uMnyango wezeMfundo e-Free State, uHoward Ndaba ukuze aphawule.

UReoletile uzofihlwa ekhaya lakhe e-Manyatseng ngoMgqibelo.