Lubhalwe nguLungani Zungu
Ipolitiki yobumbano iza nobungozi nemivuzo.
KuMasipala weTheku onesabelomali sika-R55 billion, iMeya ye-ANC inikeze izikhundla ezimbili ezinamandla kulabo eyakhe nabo umbimbi, bobabili abanoxhaso oluncane lwamavoti edolobheni elisogwini.
Emasontweni amabili edlule uZandile Myeni we-NFP uqokwe njengePhini leMeya. Iqembu lakhe elincane elinesihlalo esisodwa likwazile ukuthola amavoti angu-0.3% kuphela okhethweni lohulumeni basekhaya lwango-2021. Kodwa ngoLwesithathu leli khansela elingaziwayo lethulwe njengoSihlalo wesikhundla esisha kweZokuphepha kanye nezimo eziphuthumayo ekomidini eliphezulu.
Omunye ohlomule ngesikhundla kumusa we-ANC nguThabani Miya we-EFF, osethathe izintambo njengoSihlalo wekomidi elinamandla lezokuHlaliswa kwaBantu kanye nengqalasizinda. I-EFF yathola u-10% kuphela wamavoti okhethweni lwango-2021.
Lezi zikhala ziqhamuke ngemuva kokuthi lowo obeyiPhini leMeya uPhilani Mavundla ekhonjwe indlela. Ukhishwe ngesiphakamiso sokungabethembi ubuholi bakhe ngoZibandlela ngemuva kokungaboni ngasolinye neMeya ye-ANC uMnu Mxolisi Kaunda.
UMavundla onguMengameli we-Abantu Botho Congress usize i-ANC ukuthi igcine uMasipala omkhulu ngemuva kokuthi leli qembu lihlulekile okokuqala ngqa kusukela ngo-1994 ukuthola amavoti amaningi ngokhetho lohulumeni lwango-2021. Uke waba sekomidini le Meya esikhundleni esiphethwe uMiya we-EFF.
IPhini likaSihlalo we-ANC esifundeni saseThekwini, uMnu Thembo Ntuli uqokwe njengomphathi omusha wezepolitiki aphinde abe nguSihlalo weKomidi lezokuThuthukiswa koMnotho, ukuHlela nokuHweba.
Ikhansela le-ANC uMnu Snenhlanhla Sishange unguSotswebhu kulo Mkhandlu obekuyisikhundla ebesiphethwe nguNtuli kwaze kwaba uyasula ngoZibandlela.
UNobhala we-ANC esifundeni uMusa Nciki uthe izinguquko ezintsha kuhloswe ngazo ukusheshisa ukuhlinzekwa kwezidingo kubantu.
Uphinde wamemezela ukuthi i-ANC ikwamukele ukwesula kukaMnu Ntokozo Sibiya njengomphathi wezepolitiki noSihlalo weKomidi.
Ozongena esikhaleni sikaSibiya uzomenyezelwa ngokuhamba kwesikhathi njengoba uhlelo lokuvala isikhala sakhe lusaqhubeka.
Esithombeni esingenhla: Unobhala we-ANC esifundeni uMusa Nciki ememezela izinguquko kwi-exco yeTheku
Umthombo wesithombe: ANC esifundeni saseThekwini