Sihle Mkhize
Usesimeni esibucayi esibhedlela sase-Sandton eGoli oyilungu eliqavile leqembu le-Kwaito i-Chiskop, uGeneral GTZ ngemuva kokutholakala ukuthi unomdlavuza wesisu.
UGeneral, ogama lakhe langempela nguSiphiwe Sibisi, wasungula iqembu le-kwaito i-Chiskop nongasekho uMduduzi “Mandoza” Tshabalala, uSizwe “Lollipop” Motaung kanye noSibusiso “Bless” Thanjakwayo.
Leli qembu laduma ngeminyaka yango-90 ngezingoma ezishisa izikhotha njengethi “Klaimer”, “Abasazi” kanye nethi “Abantwana”.
Ekhuluma ne-Scrolla.Africa esembhedeni wakhe wasesibhedlela, uGeneral uthe ugcine esesimweni esibi kangaka ngemuva kokusinda ekuhlinzweni okungahambanga kahle eminyakeni embalwa edlule.
“Inkinga iqale cishe ezinyangeni eziyisithupha ezedlule. Ngiye ukuyohlinzwa bangisika amashubhu okungewona esiswini nokuyilapho okonakele khona, ngidonsa kanzima ngokwezimali ukuze ngikhokhe izikweletu kodwa ngibonga abangesekayo,” esho.
Umngani kaGeneral uMapaputsi uthe lo mculi odumile we-kwaito udonsa kanzima ukukhokha izikweletu zesibhedlela.
“UGeneral akuyena nje omunye umculi ungumngani yingakho ngimeseka. Izindleko zesibhedlela ziyanqwabelana kodwa mina nabanye siyasiza lapho esingakwazi khona,” kusho uMapaputsi.
Lo mculi odumile udinga usizo oluphuthumayo, kusho umthombo utshela i-Scrolla.Africa.
“Lokhu kubi kakhulu, ukunakekelwa kwezempilo kukaGeneral kudinga ukunakwa. Ngeke sikwazi ukulahlekelwa nguye embonini yezokuncebeleka. Sesithule isikhathi eside ngalolu daba. Uma siba munye, mhlawumbe singasindisa impilo yakhe.
“I-Chiskop ivule indlela kubaculi abaningi. Ngicela uMzansi usisize. Sihlela ukumvakashela,” kusho umthombo.
Selokhu kwaduma i-kwaito, uGeneral usesebenze nabadidiyeli abahamba phambili kuleli, abafana noMandla Spikiri noGabiel Gabi Le Roux phakathi kwabanye.