Lubhalwe nguRorisang Modiba
Kulindeleke ukuduma okuhambisana nesichotho, izikhukhula nomoya onamandla e-Gauteng, eMpumalanga, e-Free State naKwaZulu-Natal ngoMsombuluko njengoba kukhishwa izexwayiso.
Kulindeleke ingozi enkulu yomlilo ezingxenyeni eziseningizimu-ntshonalanga ye-Northern Cape nasezingxenyeni ezisentshonalanga ye-Western Cape ngosuku olufanayo.
Iziphepho ezinamandla zizogadla ezingxenyeni ezithile zaseNingizimu Afrika ngoMsombuluko, kodwa imindeni eminingi isivele ibhekene nenkinga yesichotho sangeSonto ebusuku.
NgeSonto ngomhlaka-30 kuLwezi ka-2025, isichotho sigadle ezingxenyeni ezithile zase-Gauteng, eMpumalanga nase-North West.
Abantu basePitoli, eKempton Park, Edenvale naseGoli babanjwe isichotho kungazelelwe sacekela phansi impahla nezimoto.
Lesi siphepho siphinde senza ukuthi ukuminyana kwezimoto kwangabekezeleka njengoba izimoto zidonsa kanzima emigwaqweni evalekile neshibilikayo.
I-Middelburg eMpumalanga nayo ihlaselwe, kwathi iHartbeespoort neBrits eNorth West babhekene nezimo ezinzima ezifanayo.
ISouth African Weather Service ithi kulindeleke ukuthi kube nokuduma kwezulu okunamandla.
Lezi ziphepho zingase zilethe umoya onamandla, isichotho kanye nezikhukhula kungazelelwe e-Gauteng, eHighveld kanye ne-escarpment yaseMpumalanga, eningizimu-ntshonalanga yeLimpopo, empumalanga yeFree State, ezingxenyeni zase-North West kanye nasenyakatho-ntshonalanga yeKwaZulu-Natal.
Lesi sexwayiso silandela isichotho nombani wangeSonto, okushiye imindeni eminingi inyakazisekile.
Khonamanjalo, abesimo sezulu bathi izingxenye eziseningizimu-ntshonalanga yeNorthern Cape kanye nezingxenyeni ezisentshonalanga yeWestern Cape zibhekene nengozi enkulu yomlilo ngoMsombuluko.
Izimo ezishisayo, ezomile nezinomoya zingenza imililo ibhebhetheke ngokushesha okukhulu.
Kunxuswa abantu kuzo zonke izindawo ezikhahlamezekile ukuthi bahlale beqaphile njengoba isimo sezulu sisalindelekile.
Esithombeni esingenhla: Isimo sezulu.
Umthombo wesithombe: Ifayela