Linda Ximba
I-Boxing South Africa (BSA) ihoxise amalayisensi kaphromotha uTshele Kometsi nemenenja uMichael Sediane ngokushaya umshayisibhakela eringini.
UKometsi uyisikhulu se-TK Boxing Promotions aphinde abe ngusihlalo we-Gauteng Boxing Promoters Association.
USediane, owayengumshayisibhakela okhokhelwayo, ungumphathi wedlanzana labashayisibhakela abakhokhelwayo eGoli.
I-BSA ikhiphe isitatimende esicaphuna ibamba loMphathi uNsikayezwe Sithole ethi “i-Boxing SA imemezela ukumiswa kwamalayisensi alaba abalandelayo: uMnu Michael Sediane kanye noMnu Tshele Kometsi.
“UMnu Kometsi usevele phambi kwekomiti eliqondisa izigwegwe le-Boxing SA kanti ukulalelwa kwecala lakhe kuzoqhubeka ekupheleni kwale nyanga. UMnu Sediane, esigamekweni esibonakale bukhoma kumabonakude, ushaye umshayisibhakela kanti uzovela phambi kwekomiti eliqondisa izigwegwe le-Boxing SA ngokuhamba kwesikhathi.”
USithole uthe ukuvela kukaKometsi ngaphambi kwekomiti lokuqondisa izigwegwe kusukela enkulumweni yakhe nabezindaba ngasekupheleni konyaka odlule.
Lo promotha ophumele obala wagxeka ibhodi le-BSA wathi lithatha uhlangothi nokuthi lihlukanisa opromotha ngokuhlehlisa eminye imiqhudelwano nokungasekeli eminye.
“Kuyacaca ukuthi ibhodi lihlukanisa ophromotha kuleli ngoba abanye babonakala bebalulekile kunabanye. Mina, Tshele Kometsi, ngangikweleta i-Boxing SA u-R15,000 ngase ngitshelwa ukuthi ngeke ngikwazi ukusingatha umqhudelwano ngingakasikhokhi ngokugcwele isikweletu sami.
“Kwenzeke okufanayo ezinkampanini zokupromotha i-Rumble Africa, i-TLB kanye ne-Dream Team. I-BSA ayikwazanga ukugunyaza imiqhudelwano yabo ngoba bebekweleta imali.”
Isitatimende se-BSA siqhube ngokuthi ukumiswa kwabo kuyimizamo yokuthuthukisa ubuqotho balo mdlalo.
“I-Boxing SA ithanda ukuncoma abanamalayisensi abenza konke okusemandleni abo ukuthuthukisa isithunzi salo mdlalo.
“Iphinde yeluleka ngokuthi labo abanamalayisensi ngesizathu esithile abangafuni ukuhambisana nokuba yisibonelo kwabanye, bazozithola sebebhekene nokuqondiswa izigwegwe.”