Buziwe Nocuze
Abesifazane abathandanayo base-Khayelitsha, eKapa basabela impilo yabo ngemuva kokuhlaselwa endaweni yokucima ukoma.
Impi iqale ngemuva kokuthi umsolwa ebatshele ukuthi uyabazonda abesifazane abathandana nobulili obufanayo ngoba bazitshela ukuthi bangamadoda.
Kuthiwa umsolwa ushaye uMonalisa Feke nentombi yakhe u-Ellen Mponzo ethi ufuna ukubakhombisa ukuthi ngeke balwe naye ngoba abawona amadoda.
UMonalisa utshele i-Scrolla.Africa ukuthi ubeyobheka u-Ellen endaweni yokucima ukoma ngoMgqibelo ngabo-4.30 ekuseni ngesikhathi ezithela phezu komhlaseli wabo.
Uthe ubengaqali ukuhlangana nalo mlisa.
“Phambilini emini uze kimi wangitshela ukuthi ngiyeke ukukhuluma ngaye. Bengithukile ngoba bengingakaze ngikhulume ngaye,” kusho uMonalisa.
“Kodwa ube eseqala ukungishaya. Ngiyaqonda ukuthi ubefuna nje izaba zokungihlasela.”
Ngesikhathi emshaya uMonalisa uthe lo mlisa ubelokhu ethi ufuna ukumkhombisa ukuthi akayona indoda.
Ubencenga lo mlisa ukuthi ayeke ukumshaya. Uthi ngesikhathi ephansi kufike omunye umlisa.
“Benginethemba lokuthi uzongihlenga kodwa ubezosiza umhlaseli wami,” esho.
Uthe ukwazile ukubaleka kodwa wabona ukuthi ulahle okhiye bendlu yakhe endaweni yokucima ukoma nokumenze waphoqeleka ukuthi abuyele emuva.
“Ngesikhathi ngifika endaweni yokucima ukoma ngifice u-Ellen opha futhi esezinhlungwini. Naye ubeshaywe yilo mlisa omtshela ukuthi uyabazonda abantu abathandana nobulili obufanayo,” kusho uMonalisa.
Lezi zithandani zithi sezihlalele ovalweni, abazi ukuthi kuzokwenzakalani ngabo ngokulandelayo. Bathe lo mlisa uhlala kuyo le ndawo.
Bebelokhu behlezi endlini kusukela ngeSonto futhi abakwazi ukuphuma ngoba abanaso isiqiniseko sokuthi uma bephuma bazobuyela endlini besaphila yini.
UFuneka Soldaat, isishoshovu somphakathi wabesifazane abathandana nobulili obufanayo ophinde abe ngummeli we-Free Gender uthe izigameko ezifana nalezi zizoqhubeka ukwenzeka ngaphandle uma imiphakathi iphatha abesifazane abathandana nobulili obufanayo ngendlela efanayo nabesifazane abahlukunyeziwe.
Okhulumela amaphoyisa ase-Western Cape uKaputeni Frederick Van Wyk, uthe kuvulwe icala lokushaya kwa-SAPS e-Harare ukuze kuphenywe.
“Kuboshwe owesilisa (32), uvele eNkantolo yeMantshi yase-Khayelitsha ngoMsombuluko. Icala lakhe lihlehliselwe umhla zizinye kuNtulikazi ukuze kuzoqhutshekwa nophenyo,” kusho uVan Wyk.