Lubhalwe ngu-Anita Dangazele
Ukuthunjwa kwabantu ukuze kukhishwe imali yokubahlenga kuyisihlava esihlasele i-Eastern Cape.
Akukho okukhombisayo ukuthi lokhu kuyancipha. Emasontweni amabili edlule uRiana Pretorius (26) uye wathunjwa ngesikhathi efika emsebenzini e-Gqeberha’s Newton Park. Kuthiwa kufike amadoda amathathu kuye amfaka ebhuthini yemoto yohlobo lwe-Toyota Corolla emhlophe, kubika ozakwabo.
UPretorius udedelwe esikhathini esingangesonto ngemuva kokuthi kukhokhwe u-R1.1 million kubathumbi bakhe. Ubevalelwe izinsuku eziyisishiyagalombili.
Okhulumela oKlebe esifundazweni uKaputeni Yolisa Mgolodela uthe kuze kube manje kuboshwe abasolwa ababili bathweswa icala lokuthumba uPretorius.
“Umsolwa wokuqala uboshwe ngalo lolo suku lokuthumba ngemuva kokujahwa ngamalungu akwa-SAPS. Umsolwa wesibili uboshwe ngoLwesithathu kanti uzovela eNkantolo yeMantshi yase-Gqeberha mhla zinhlanu kuMbasa,” esho.
Umnikazi wesitolo (40) wase-China wathunjwa ebhizinisini aliqhuba nomyeni wakhe elokishini laseZwide e-Gqeberha. Abathumbi bafuna u-R20 million ukuze akhululwe ngemuva kwamahora ethathiwe.
Umndeni awukaze uyikhokhe imali yesihlengo. Ngemuva kosuku ethunjiwe isisulu sakwazi ukuzikhulula. Walinda kwaze kwahlwa wabe esephunyuka ngefasitela weqa udonga waboleka ucingo kumuntu ohlala khona ukuze acele usizo.
Cishe ebangeni elingamakhilomitha angu-800 omunye usomabhizinisi uHilton Wicks (24) uye wathunjwa wagcinwa izinsuku ezintathu ngaphambi kokuthi ashiywe endaweni eyayivame ukuba umngcele phakathi kwe-Transkei ne-Ciskei, e-Kei Bridge.
Umndeni wakwaWicks unamabhizinisi amaningi e-Ugie nase-Nqanqarhu ebiyaziwa nge-Maclear ngaphansi kweqembu laKwaWicks okubalwa i-Spar, i-Build It kanye negaraji likaphethiloli.
Zimbalwa izisulu ezinenhlanhla. Usomabhizinisi wase-Bay u-Ashraf Laher (45) wagcina ukubonakala ngomhlaka-19 kuMfumfu ngesikhathi amadoda ahlomile egibela iveni abeyishayela e-Korsten ahamba naye.
Yize amaphoyisa esebenzise uhlelo lwamahora angu-72 engeza izinsiza ekuthungatheni kanye noKlebe asebephethe lolu phenyo, umsolwa akakatholakali.
Umlingisi owayesafufusa nodume kakhulu ku-Tiktok uNicole Swartz (26) wanyamalala emzini wakhe ose-Gelvandale mhla ziyisishiyagalolunye futhi akakaze abonakale kusukela lapho. Umndeni wakwaSwartz uthe wahamba ekhaya waya emsebenzini; bebeshiye indodakazi yabo embhedeni, kanti ngesikhathi bebuyela endlini bekungenalutho futhi nomnyango ubuvulekile, indishi nenkomishi yekhofi kuphezu kwekhawunta yasekhishini.
Umndeni awukaze uthole noma isiphi isicelo sesihlengo.
Omunye umlingisi osafufusa u-Almonré Roman (19) waduka ngemuva kokugibela i-VW Kombi emhlophe ngaphandle kwase-Pick n Pay e-Despatch mhla zinhlanu kuZibandlela.
Ezinsukwini ezalandela uyise uWesley Uithaler wathola isicelo sesihlengo sika-R220 000 ngomqhafazo kanye nezinsongo zokuthi bazophinde bathathe indodakazi yakhe (12).
Kodwa-ke, ukuxhumana nabasolwa ngokuthumba sekumile.
“Njengoba isikhathi siqhubeka kuba nzima ukucabanga ukuthi sizophinde siyithole yini indodana yami,” kusho u-Uithaler.
Esithombeni esingenhla: Isicathulo esasala ngesikhathi kuthunjwa umuntu
Umthombo wesithombe: Anita Dangazele