Lubhalwe ngu-Anita Dangazele
- Isigebengu esihlomile sintshontshe iselula yesisebenzi sasesibhedlela i-St Elizabeth Hospital, eLusikisiki ngesikhathi besebenza ebusuku.
- Izibhedlela zase-Eastern Cape zibhekene nenkinga yobugebengu njengoba izikhungo ezingu-119 zihlaselwe yizigebengu ngonyaka odlule nakuba kusetshenziswe u-R700 million kwezokuphepha.
Yize kusetshenziswe imali ecishe ibe yizigidigidi zamarandi ekuvikeleni izikhungo zezempilo e-Eastern Cape, izigebengu zisaqhubeka nokudala umonakalo ngaphandle kokujeziswa.
Esigamekweni sakamuva sokwephulwa kwezokuphepha esibhedlela, isigebengu singene esibhedlela i-St Elizabeth eLusikisiki sagebenga umsebenzi simkhombe ngommese sathatha umakhalekhukhwini wakhe ngoLwesithathu ebusuku.
Okhulumela amaphoyisa ase-Eastern Cape uLieutenant Colonel Siphokazi Mawisa uthe lesi sigameko senzeke ophikweni lwe-Emergency Medical Services.
“Amaphoyisa angakuqinisekisa ukuthi isisulu esineminyaka engu-46 ubudala besisemsebenzini kwesinye sezibhedlela eLusikisiki ngoLwesithathu ngezikhathi zangabo-01:15 ezintathakusa ngesikhathi kungena umfana/owesilisa ongaziwa wasiphuca iselula ephethe umbese,” usho kanje.
UMawisa uthe abazi ukuthi isigebengu sidlule kanjani konogada esangweni elikhulu.
Akekho osaboshiwe kodwa amaphoyisa aphenya icala lokugetshengwa kwebhizinisi esiteshini saseLusikisiki.
Okhulumela uMnyango wezeMpilo e-Eastern Cape uMkhululi Ndamase uthe kube nezigameko zobugebengu ezimbili esibhedlela ngalobo busuku, kodwa wangakwazi ukunikeza imininingwane ngesesibili.
“Singawaqinisekisa amacala amabili okugetshengwa ngoLwesithathu ebusuku; umsebenzi wakwa-EMS ubanjwe inkunzi ekhonjwe ngombese esibhedlela iSt Elizabeth.
“Umnyango ususinyusile isibalo sonogada. Siqinise nokusetshenziswa komtshina wensimbi esangweni,” kusho uNdamase.
Lokhu kugetshengwa kuyingxenye yokwanda kobugebengu obuhlasela izibhedlela zase-Eastern Cape. Ngonyaka wezimali ka-2023/24 uwodwa, izigebengu sezishaye izikhungo zezempilo ezingu-119 esifundazweni sonke.
Lokhu kwenzeka nakuba uMnyango wezeMpilo esifundazweni usebenzise imali engaphezu kuka-R700-million kwezokuphepha ngonyaka odlule.
Isifunda saseNelson Mandela Bay sishayeke kakhulu. NgoNcwaba izigebengu ezazihlomile zabamba abasebenzi basemtholampilo oseMotherwell Unit 8 zathatha amaselula nezinye izimpahla.
Esithombeni esingenhla: Umnyango wesibhedlela i-St Elizabeth’s eLusikisiki e-Eastern Cape.
Umthombo: X