Celani Sikhakhane
Ngaphambi kokuthi ilungu le-ANCYL KwaZulu-Natal uMfundo Mokoena abulawe ukhulume ngesimo sokuphepha kwakhe nokungakwazi ukuba nemali yokukhokhela onogada.
UMokoena obedume ngokungangcethezi ubulawe ngoMsombuluko ebusuku esitobhini saKwaCele esiseduze nomuzi wakhe e-Adams Mission eningizimu yeTheku.
UMokoena owaziwa ngokuba ngumlandeli omkhulu kaMengameli we-ANC uCyril Ramaphosa esifundeni saseThekwini ubengumholi wegatsha kuwadi-67.
Abaholi be-ANC esifundazweni bamatanisa ukushona kwakhe nengqungquthela yokukhetha ubuholi be-ANC esanda kwenzeka.
Uhole umkhankaso kaThabani Nyawose ephikisana noZandile Gumede ngokuphumela obala ngaphambi kwengqungquthela yesifunda ukuthi abe nguSihlalo weqembu.
Umkhankaso ubufuna uRamaphosa athathe ihlandla lesibili njengoMengameli we-ANC.
Kuthe uma uGumede egcina ephumelele uMokoena uthe “Njengomuntu okwingqungquthela ngiyawamukela umphumela nobuholi bukaZandile njengoSihlalo omusha, uMusa Nciki onguNobhala, uNkosentsha Madlala iPhini likaNobhala noThembo Ntuli njengePhini likaSihlalo. Ngiyakholelwa enqubeni yentando yeningi.”
Umthombo uthe kunzima ukuqagela ngokubulawa kukaMokoena ekubeni uMokoena ubenentshisekelo yokuba sesikhundleni esiphezulu esifundazweni.
“Ngaphambi kwengqungquthela yokukhetha ubuholi ubekhuluma kakhulu ngezinto eziningi ngaze ngasabela nokuphepha kwakhe, kodwa wathi akukho angakwenza njengoba engakwazi ukukhokhela onogada,” kusho umthombo.
Ubeyilungu lohlaka lwesikhashana lwe-ANCYL olwabunjwa ukuze kwakhiwe kabusha i-ANCYL e-KZN.
I-ANC esifundeni seTheku izwakalise ukushaqeka kwayo ngokubulawa kukaMokoena.
UNobhala uMusa Nciki uxwayise ngemibono ephehla uzwathi eqenjini.
“Labo abanolwazi olungaholela ekuboshweni kwalaba bantu kumele basheshe babikele amaphoyisa esiteshini esiseduze ukuze kuphele ukuqagela.
Sicela izintatheli zingawukhiphi umbiko ongesilona iqiniso futhi ongasusa uthuthuva udale uqhekeko emphakathini kanye naseqenjini,” kusho uNciki.