Lubhalwe nguDylan Bettencourt
Uthish’omkhulu ugwazwe esandleni ngesikhathi elamula impi yokuziphindiselela phakathi kwabafundi base-West Ridge naseHoërskool Roodepoort.
Abafana abayisithupha abenza uGrade 12 eWest Ridge bamiswe izinsuku eziyisikhombisa ngemuva kodlame lwangoMsombuluko olulimaze abafundi abathathu.
Uthish’omkhulu ugwazwe esandleni ngesikhathi ezama ukulamula izingxabano phakathi kwabafundi bezikole ezimbili zaseRoodepoort.
Lokhu kuhlasela kwenzeke ngoMsombuluko, mhlaka-18 kuNcwaba, ngesikhathi abafundi baseWest Ridge High School beya eHoërskool Roodepoort beyofuna ukuziphindiselela ngemuva kwempi edlule.
Lezi zikole bezixabane ngoLwesihlanu,mhlaka-15 kuNcwaba, empini eyasabalala ezinkundleni zokuxhumana.
UNgqongqoshe wezeMfundo eGauteng uMatome Chiloane ulugxekile udlame olushiye uthish’omkhulu waseHoërskool Roodepoort elimele kwalimala kanzima abafundi abathathu.
UMnyango wezeMfundo eGauteng uthe iqulu laseWest Ridge lihlasele abafundi lajikijela izimoto ngamatshe.
Ngesikhathi kuliwa uthish’omkhulu uzame ukudambisa isimo kodwa wagwazwa esandleni. Uphuthunyiswe esibhedlela ukuze athole ukwelashwa kodwa usephumile.
Abafundi abathathu baseHoërskool Roodepoort bathole ukulimala kanzima futhi bathola usizo lwezempilo.
Abafana abayisithupha abenza uGrade 12 baseWest Ridge High School bahlonzwe njengabaphehli bothuthuva. Bathole izincwadi zokumiswa ngoLwesibili, mhlaka-19 kuNcwaba.
Laba bafana bamiswe izinsuku eziyisikhombisa besalinde ukuvela phambi kwekomiti eliqondisa izigwegwe.
Okunye ukumiswa kungase kwenzeke njengoba sisaqhubeka nokubheka ubufakazi,” kusho uMnyango wezeMfundo.
Ukuthuthukisa ezokuphepha, uMnyango ucele amaphoyisa aseRoodepoort ukuthi aseke zombili izikole futhi enze umkhankaso wokusesha kungazelelwe.
Umnyango uphinde wathumela ithimba lawo lokweseka kanye nophiko lwezempilo ukuze luhlinzeke ngokwelulekwa ngokwengqondo kubafundi nabasebenzi abathintekile.
UChiloane uthe uphazamisekile ngodlame nokulimala kukathish’omkhulu.
“Akwamukelekile neze ukuthi udlame olufana nalolu selukapakele nasezikoleni zethu, lapho ukuphepha kwabafundi nothisha kuphazamiseka,” usho kanje.
“Kuyakhathaza kakhulu ukuthi uthish’omkhulu, emizamweni yakhe yokuvikela abafundi, uvele walinyazwa. Ngeke sivumele udlame nokusatshiswa ezikoleni zethu.”
Isithombe esingenhla: iHoërskool Roodepoort.
Umthombo wesithombe: Hoërskool Roodepoort Facebook