Arthur Greene
Umzingeli odume kabi wamabhubesi, izindlovu nezindlulamithi udutshulwe wabulawa e-Limpopo.
Inkampani ka-Riaan Naude i-Pro Hunt Africa inikeza amakhasimende ayo ithuba lokuzingela izilwane zasendle eduze kwase-Kruger National Park.
I-akhawunti yenkampani yaku-Instagram ihlezi ithumela izithombe zale ndoda (55) imile eduze kwezilwane zasendle ezihlatshiwe.
Esinye isithombe simkhombisa eqoshame eduze kwendlulamithi efile enenxeba elikhulu elisobala entanyeni. Kwesinye isithombe, uNaude udonsa umhlwenga webhubesi elifile ukuze aphakamise ikhanda athwebule isithombe.
Ngesonto eledlule, uNaude udutshulwe wabulawa ngemuva nje kokuthi iloli lakhe lime ku-Marken Road e-Limpopo.
Ozibonele ngawakhe uthe kuqhamuke imoto yohlobo lwe-Nissan emhlophe efike yama eduze kweloli lakhe, kuphume amadoda amabili ngokushesha avele adubula uNaude ekhanda.
Okhulumela amaphoyisa uLieutenant Colonel Mamphaswa Seabi uthe okwamanje bekungakaziwa imbangela futhi akukaboshwa muntu.
“Owesilisa ubelele ebheke phezulu egcwele igazi ekhanda nasebusweni,” kusho uSeabi etshela i-Daily Mail.
Umthombo wesithombe: @nypostt