Lubhalwe ngu-Everson Luhanga
Kudutshulwe kwabulawa osomatekisi ababili eMidrand emasontweni ambalwa kubulawe omunye usomatekisi esigamekweni esehlukile eMarlboro.
Oshayasibhamu bahlasele babulala abanikazi bamatekisi ababili abebehamba ngeToyota Corolla emhlophe eCarlswald, eMidrand, ngoLwesibili ekuseni.
Lesi sigameko sokubulala silandela ukubulawa kwesikhulu samatekisi uMolefe Moekeletsi ngenyanga edlule eMarlboro, ngase-Alexandra.
Kudutshulwe kwabulawa osomatekisi ababili esigamekweni sasemini eMidrand, eGoli, ngoLwesibili esigamekweni amaphoyisa asola ukuthi ngelinye icala lodlame lwamatekisi.
Izisulu ezimbili, ezineminyaka engu-53 no-38 ubudala, bezingamalungu e-Alexandra Taxi Association (ATA). Bezihamba ngemoto yohlobo lweToyota Corolla emhlophe kuNew Road eCarlswald ngesikhathi oshayasibhamu ababekwenye imoto bevulela ngenhlamvu.
Amaconsi egazi nezimbobo zezinhlamvu abegcwele emotweni. Zombili izisulu kuthiwa zishonele endaweni yesigameko.
Ngesikhathi ithimba leScrollla.Africa lifika endaweni yesigameko, abaphenyi bamaphoyisa bebesacubungula ubufakazi ngemuva kwamahora okuhlasela.
Okhulumela amaphoyisa esifundazweni saseGauteng uLieutenant Colonel Mavela Masondo uthe isigameko sokudubula senzeke ngi-11:10 ekuseni. “Abashonile bahlaselwe abasolwa ababalelwa kwabathathu abebehamba ngemoto yohlobo lwe-sedan emhlophe.
Uthe amaphoyisa aphume umkhankaso wokuthungatha, kodwa bekungakaboshwa muntu. “Imbangela yokubulawa ayikaqinisekiswa okwamanje, nakuba kusolakala ukuthi kuhlobene nodlame lwamatekisi,” kusho uMasondo.
Unxuse umphakathi ukuthi ongaba nolwazi ukuba aphumele obala noma ashayele esiteshini samaphoyisa esiseduze kuCrime Stop ku-08600 10111.
Lokhu kubulala kuza ngemuva kwamasonto ambalwa kubulawe uMolefe Moekeletsi, usihlalo we-Alexandra, Randburg, Midrand, Sandton Taxi Association (Armsta).
UMoekeletsi kanye nomunye wonogada bakhe badutshulwa babulawa eMarlboro ngomhlaka-30 kuMfumfu. Kusinde omunye unogada kulokhu kuhlasela. Umshayeli obedlula naye ulimele.
Kamuva amaphoyisa athole imoto okubalekwe ngayo , inamagobolondo ezinhlamvu namachaphaza egazi, ishiywe eduze nomfula i-Jukskei.
Ngesikhathi eshona, uMoekeletsi wayesanda kuhola umcimbi wokuthula e-Alexandra lapho ayenxuse ukuthi kuphele ukuchitheka kwegazi embonini yamatekisi.
Uma ungamfuni umholi, linda kuphele isikhathi sakhe bese uyavota ,” esho etshela abe-operator emcimbini wangomhlaka-19 kuMandulo.
USihlalo we-Alexandra Taxi Association, uMnuz Vusi Mayaba, naye uthembise ukuthi ngeke kusaba khona ukubulawa kwabantu ngesikhathi esaphethe.
UMoekeletsi uke wasinda ngesikhathi izigebengu zishisa amatekisi akhe angaphezu kuka-10.
Esigamekweni sokuhlasela kwaseMarlboro, oshayasibhamu abebehamba ngeBMW X5 emhlophe bavulele ngenhlamvu bebhekise ezimotweni ezimbili – i-Audi neveni iMahindra. Kushone abantu ababili kwalimala abane, okuhlanganisa nezakhamuzi ezabanjwa ngesikhathi kuqubuka ingxabano.
I-BMW kamuva yatholwa ishiywe eduze.
Amaphoyisa athi isigameko sokudubula eMarlboro kukholakala ukuthi sihlobene nodlame lwamatekisi.
Esithombeni esingenhla: Isigameko sobugebengu lapho kudutshulwe kwabulawa osomatekisi ababili eMidrand, eGoli ngoLwesibili ntambama
Umthombo wesithombe: Everson Luhanga