Sandiso Phaliso
Kudutshulwe kwabulawa isiboshwa ngaphakathi eNkantolo yeMantshi yase-East London ngoLwesibili njengoba kuthiwa ubezama ukugwaza umabhalane wasenkantolo nezikhulu ebezimphelezela ngomzamo wokweqa ejele.
Ubehlome ngesikhali esibukhali azenzele sona.
Okhulumela abezokuHlunyeleliswa kweziMilo e-Eastern Cape, uSingabakho Nxumalo utshele i-Scrolla.Africa ukuthi le ndoda eneminyaka engama-25, ibiyisigebengu esigwetshwe e-East London Correctional Centre.
Ubegwetshwe udilikajele ngecala lokudlwengula, ukubamba inkunzi kanye nokweqa esitokisini esisemthethweni. Ubevele phambi kweNkantolo yeMantshi e-East London ngecala langowezi-2018 lapho azame khona ukweqa ejele.
“Udutshulwe wabulawa ngesikhathi ezama ukugwaza umabhalane wasenkantolo nezikhulu ebezimphelezela ngaphakathi enkantolo ngemuva kokukhishwa ozankosi namaketangu emilenzeni ngokomyalelo wesikhulu esengamele, kusho uNxumalo.
“Izikhulu ebezimphelezela zidubule inhlamvu yesixwayiso njengoba ebesevele esegwaze isikhulu, kodwa lokho akuzange kumvimbe ukuba ahlasele amaphoyisa kwabe sekudutshulwa okwesibili”.
Uthe lesi siboshwa sinqotshwe ukulimala sashonela khona lapho. Igama lakhe ngeke lidalulwe njengoba umnyango usezinhlelweni zokwazisa izihlobo.
Okhulumela amaphoyisa uBrigadier Tembinkosi Kinana uthe amaphoyisa ayaphenya kanti idokodo lophenyo selivuliwe.
U-Unathi Nkosana, obeze ukuzolalela icala lomngani wakhe kwenye inkantolo uthe inkantolo okukhulunywa ngayo inonogada kuphela, izikhulu zenkantolo, umabhalane, utolika, ummeli wezokuvikela, umshushisi kanye nemantshi.
“Bekungekho malungu omphakathi enkantolo. Ngesikhathi kuzwakala ukuqhuma kwesibhamu, bekungekho muntu phansi. Bekusobala ukuthi kukhona okwenzekile,” esho.
Uthe bagcine bezwile ukuthi kudutshulwe isiboshwa.