Lungani Zungu
Isishoshovu sezepolitiki se-ANC uSduduzo Magwaza usephenduke isisulu sakamuva seqembu elibusayo KwaZulu-Natal.
Ngonyaka odlule nje kuphela, kwabulawa izishoshovu ze-ANC eziyisithupha ezigamekweni zokubulala ezihlobene nezepolitiki.
Ukudutshulwa kukaMagwaza oneminyaka engama-42, obengumsekeli omkhulu walowo owayeyiMeya yeTheku uZandile Gumede, sekudale izinxushunxushu esifundazweni.
UGumede utshele abakwa-Scrolla.Africa ukuthi unovalo ngempilo yakhe.
“Sisanda kugubha ukuthi akekho umlingani wethu oshonile ngesikhathi samaholide. Kwavele kwenzeka lesi sigameko. Nginovalo ngokuphepha kwami kanye namanye amaqabane,” kusho uZandile.
Kodwa lowo owayeyiMeya yeTheku akaphawulanga ngokuthi uyakholelwa yini ukuthi ukubulawa kukaMagwaza kudalwe ukungezwani kwezepolitiki ngaphakathi kwe-ANC Kwa-Zulu Natali.
“Sizosazi isizathu sokubulawa uma amaphoyisa esephothule uphenyo,” kusho uZandile.
UMagwaza kuthiwa udutshulwe ngaphandle komuzi wakhe e-Cornubia, e-Verulam eThekwini edutshulwa izinkabi ezingaziwa ezibaleke ngezinyawo.
UGumede uchaze abahlaseli njengabahedeni abangamhloniphi uNkulunkulu.
“Laba ngabantu abangenanhliziyo abasakholelwa ekusebenziseni isibhamu. Sebephuce umndeni umuntu obondlayo,” kusho uZandile.
“Ngilahlekelwe ngumuntu ebengikwazi ukukhuluma naye kalula nganoma yini. Besinobudlelwano obuqinile ngenxa yendlela aziphatha ngayo njengosopolitiki nomuntu.”
UMagwaza ubeyizwi elihamba phambili emkhankasweni wokuthi uGumede aqokwe kabusha njengoSihlalo wesifunda se-ANC eThekwini uma le nhlangano isibamba ingqungquthela yokukhetha ubuholi okulindeleke ukuthi ibanjwe ngaphambi kukaMbasa.
Ubeyingxenye yesixuku esamasha saya kuNdunankulu we-ANC esifundazweni ngowezi-2019, sinxusa ukuthi kubuyiswe uGumede njengemeya yeTheku.
UMagwaza wayefuna ukuba ikhansela laku-Ward 30 eThekwini ngesikhathi sokhetho lohulumeni basekhaya lwangonyaka wezi-2016 ahlulwa kulo.
Umfowabo kaMagwaza ososizini uThami uthe: “Umfowethu ubefana nenhlaka ebibambe umndeni wethu ngokubambisana. Lokhu kusishaye kakhulu.”
Amaphoyisa esifundazwe aphenya icala lokubulala. Akukaboshwa muntu ngalesi sigameko.
Abanye osopolitiki asebebulewe KwaZulu-Natali kubalwa:
- Lowo owayenguNobhala wophiko lwentsha lwe-ANC uSindiso Magaqa owadutshulwa wabulawa ngowezi-2017
- Ikhansela le-ANC eMtubabuta, uMnuz Philip Mkhwanazi, wadutshulwa esemzini wakhe ngoNhlaba nyakenye
- USihlalo we-ANC eMlazi, uMnuz Bhekithemba Phungula wadutshulwa ngoNhlangulana wonyaka odlule
- Ikhansela le-ANC KwaZulu-Natali uMartin Sithole wadutshulwa ngoNhlaba wezi-2019
- Ilungu le-ANC uMaxwell Hadebe wadutshulwa wabulawa ngoNhlangulana wezi-2019
- USindisiwe Ndlovu, oyilungu lophiko lwentsha KwaZulu-Natali wadutshulwa ngoZibandlela wezi-2019
- Unobhala wegatsha lophiko lwentsha lwe-ANC e-Hammarsdale uKingdom Gcabashe wadutshulwa wabulawa esemzini kamngani wakhe ngowezi-2020.