Lubhalwe ngu-Everson Luhanga
Sekuboshwe abasolwa abayisikhombisa ngokuthwebula izithombe zezingane zingagqokile esikhathini esiyizinyanga ezintathu.
Omunye wesilisa oboshiwe ubezenza umfana omncane ezinkundleni zokuxhumana e-Worcester, e-Kraaifontein nase-Mitchell’s Plain eWestern Cape.
Umsolwa oneminyaka engu-53 ubudala wase-Worcester ube ngowokuqala ukuboshwa ngoLwesithathu olwedlule. Utholwe enezithombe zezingane ezingu-95,000 namavidiyo angu-6,000. Ubhekene necala lokuthola lezi zithombe nokuzisabalalisa kanye nokuba nezithombe zezingane ezincane zinqunu.
Umsolwa wesibili (40) uboshwe eKraaifontein ngoLwesine olwedlule, watholakala nezithombe ezingaphezu kuka-149,000 namavidiyo angu-5,000.
Utholwe nezibhamu nezinhlamvu ezimbili ezingekho emthethweni, nezinyoka eziyisishiyagalolunye ezintathu akanayo imvume yokuzifuya. Ubhekene namacala okutholakala nezibhamu nezinhlamvu ezingekho emthethweni, ukutholakala nezithombe, ukuzisabalalisa kanye nokutholakala nezithombe zezingane ezincane zingagqokile.
Okhulumela amaphoyisa kuzwelonke uBrigadier Athlenda Mathe ukuqinisekisile ukuboshwa.
UBrigadier Mathe uthe: “Owesilisa uzenze osemncane ukuze ayenge amantombazane asemancane ukuba angene kwizingxoxo lapho kusatshalaliswa khona izithombe zezingane zinqunu futhi kwabelwane ngazo, uphakathi kwabantu abathathu abanukubeza ngokocansi ku-inthanethi ababoshiwe ophikweni oluhlangene lwe-SAPS Serial and Electronic Crime Investigations. (SECI) iyunithi kanye noMnyango Wezokuphepha Kwasekhaya wase-USA esontweni eledlule.
“Lokhu kunyuse isibalo sabantu asebeboshiwe abanukubeza ngokocansi ku-inthanethi kusukela ngoLwezi kanti bayisikhombisa sebebonke abasaboshiwe. Abanye abane baboshwa ngoLwezi nyakenye, abathathu baboshwe eGauteng noyedwa KwaZulu-Natal.”
Uthe lokhu kuboshwa kuyingxenye yomkhankaso wamazwe omhlaba wokuthungatha abantu abasabalalisa izithombe zezingane zinqunu.
Abasolwa abathathu baboshwe e-Worcester, e-Kraaifontein, nase-Mitchell’s Plain.
Owesilisa oneminyaka engu-32 ubudala waseMitchell’s Plan ungumsolwa wesithathu oboshwe ngoLwesihlanu ngomhlaka-19 kuMasingana ngo-2024. Utholwe exoxa futhi eyenga amantombazane asemancane kwi-group lapho kusabalaliswa khona izithombe zezingane zinqunu.
“Bonke abasolwa bavele eziNkantolo ezahlukene okubalwa eyase-Worcester, i-Kraaifontein kanye neNkantolo yeMantshi yase-Mitchells Plain, amacala abo ahlehliswa ukuze kuqhutshekwe nophenyo,” kusho uBrigadier Mathe.
Isithombe esingenhla: Kuboshwa umsolwa.
Umthombo wesithombe: Sithunyelwe