Lubhalwe ngu-Everson Luhanga
Amaphoyisa abophe abasolwa abane ngemuva kokuthunjwa kosomabhizinisi wase-India esanda kufika esikhumulweni sezindiza i-OR Tambo International Airport.
Okhulumela amaphoyisa kuzwelonke, uBrigadier Athlenda Mathe uthe isisulu esithunjiwe sifika sivela e-India ngoLwesihlanu ngomhlaka-20 kuMasingana.
Uthe uphenyo lokuqala lukhomba ukuthi usomabhizinisi wase-India wayengelwa kuleli izigebengu ebezizenza osomabhizinisi.
Ngemuva kokumthumba, laba besilisa bafune imali emndenini wakhe e-India.
“Kusungulwe ithimba lezinhlaka ezehlukene elihlanganisa ongoti abahlukene ngaphakathi kwa-SAPS kwathi ngoLwesibili ngomhlaka-23 kuMasingana ithimba lathola umkhondo wabasolwa endaweni yase-Fordsburg eGoli.”
Uthe kushaqwe omakhalekhukhwini abane okuhlanganisa nalowo ofonela umndeni kanti iwashi lesisulu kanye nezincwadi zokushayela zitholwe esandleni sabasolwa kwatholakala nesibhamu esisodwa nama-SIM card ambalwa.
“Kuphinde kwashaqwa isamba semali okukholakala ukuthi yimali ekhokhwa izisulu zabo.”
Abasolwa abane bazovela ngaphambi kweNkantolo yeMantshi yase-Kempton Park ngoLwesine ngomhlaka-26 kuMasingana. Laba abane babhekene namacala okuthumba nokubamba inkunzi.
Usomabhizinisi obethunjiwe uphephile futhi uthola ukwelulekwa ngokwengqondo.
Esithombeni esingenhla: Abasolwa abane ababoshelwe ukuyenga usomabhizinisi wase-India ukuze bazomthumba kuleli
Umthombo wesithombe: Saps / Athlenda Mathe