Lubhalwe nguPrince Azeel
Kulindelwe ngabomvu ukukhishwa kwengoma ka-AKA ethi-“Company” kanti ne-albhamu yakhe ebhekwe ngabomvu i-Mass Country izokhishwa ngesonto elizayo.
Umndeni wakhe umemezele ukukhishwa kwale-albhamu ezophuma ngoLwesine oluzayo.
Isinqumo sokuqhubeka nokukhishwa kwe-albhamu bekuwukuhlonipha umrepha ongasekho, obulawe inkabi engaziwa ngoLwesihlanu mhla ziyishumi kuNhlolanja.
“Njengoba isizwe sigubezelwe ifu elimnyama ngokudlula emhlabeni kukaKiernan ‘AKA’ Forbes, umndeni wakwaForbes ukuvumile ukwesekwa nothando oluvela kuleli nangaphezulu.
“Umndeni uyaqhubeka nokugubha impilo yendodana yawo. Ukuhlonipha ifa layo lo mndeni ukhethe ukuqhubeka nokukhishwa kwe-albhamu i-Mass Country ngomhlaka-24 kuNhlolanja kulo nyaka njengoba bekuhleliwe,” kufundeka isitatimende sabezindaba.
Lesi sitatimende sidalule ukuthi u-AKA uyichithe kanjani iminyaka emibili edlule enza le albhamu, saphinde saveza nokuthi bekuyisifiso sakhe ukuthi iculo alicula noKiddominant likhishwe.
“Njengokwezifiso zikaKiernan, ingoma eyodwa elandelayo ezophuma ethi ‘Company’ ayicula ngokuhlanganyela nozakwabo wesikhathi eside ophinde abe umngani uKiddominant, ihlelelwe ukukhishwa ngoLwesihlanu ngomhlaka-17 kuNhlolanja,” kwengeza isitatimende.
Ngaphambi kokushona kwakhe kabuhlungu, u-AKA uye wamemezela ukuthi i-albhamu izophuma ngomhlaka-27 kuNhlolanja.
“Ingoma yaleli sonto ku-@applemusic Track Of The Week i-PRADA. #MassCountry manje isiku-Apple Music futhi iyeza maduze!!! 27/02/2023,” ebhala ekhasini lakhe le-Instagram.
Ngo-2018 wakhipha i-albhamu yakhe yesine enesihloko esithi-Touch My Blood ayicula ngokuhlanganyela noKiddominant, uJR, u-Okmalumkoolkat, uL-Tido, uYanga Chief, uKwesta, kanye noStogie T.
Ngemuva kwesikhumbuzo salo mrepha ngoLwesihlanu, kumenyezelwe ukuthi uzongcwatshwa ngoMgqibelo ngomhlaka-18 kuNhlolanja.
Esithombeni esingenhla: U-AKA
Umthombo wesithombe: Twitter