Lubhalwe nguCelani Sikhakhane
- Ikhomishana yabathengi ephenya izitolo ezingu-18 eKZN ngokudayisa ukudla osekuphelelwe yisikhathi ithole ukuthi inkampani ishintsha izinsuku.
- Uphenyo lwenzeke ngemuva kokuthi amalungu omphakathi ekhalaze ngezinye izitolo.
Ikhomishana yabathengi iphenya izitolo ezingu-18 KwaZulu-Natal ngemuva kokuthola ukuthi zidayisela umphakathi ukudla osekuphelelwe yisikhathi.
Uphenyo luqale ngemuva kokuthi abathengi bekhale ngenkampani yaseVerulam enyakatho yeTheku.
Ngesikhathi izikhulu zivakashile ngenyanga edlule, zifice abasebenzi befaka izinsuku izintsha emakhekheni amadala kanye nasekudleni okulula futhi bedayisa ukudla kungenawo amalebula afanele.
Lokhu kudla kuthiwa kususwa kwamanye amazwe sekuvele sekuphelelwe yisikhathi bese kudayiselwa amakhasimende aseNingizimu Afrika angenalwazi lokuthi kudala.
Okhulumela ikhomishana yabathengi uPhetho Ntaba uthe bashaqekile ngabakutholile.
“Besilapha ngenyanga edlule sizokwenza umsebenzi wokuqapha izimakethe, futhi-ke akusijabulisanga neze esikutholile,” kusho uNtaba.
“Kwezinye izimo, sikhipha izaziso zokuthobela imithetho lapho izinto zingalungiseka kalula futhi sivumela ngesitifiketi sokuthobela umthetho ukuthi sisho ukuthi ukhipha impahla emashalofini noma ulungisa noma ufake amalebula ngendlela efanele kodwa kuzoncika emthethweni owephuliwe.”
Sekuqubuke izikhalazo emadolobheni aKwaZulu-Natal ngezitolo ezidayisa ukudla okuyingozi osekuphelelwe yisikhathi ngemuva kokushona kwezingane zasemakhaya noma ukugula ngenxa yokudla ukudla okuthengwe kulezi zitolo.
Mhla zingamashumi amabili kuLwezi, uNdunankulu waKwaZulu-Natal uThamsanqa Ntuli kanye nomphathi wamaphoyisa uLt-General Nhlanhla Mkhwanazi bagasele endaweni enkulu yokugcina ukudla eThekwini eBluff lapho kugcinwe khona ukudla osekuphelelwe yisikhathi.
UNdunankulu ubonge umphakathi ngokubaluma indlebe ngalesi ngale ndawo, ikakhulukazi njengoba kubikwa izigameko eziningi zokudla okunobuthi eNingizimu Afrika yonkana.
Esithombeni esingenhla: Indawo lapho kutholwe khona ukudla osekuphelelwe yisikhathi eThekwini.
Umthombo Wesithombe: Sithunyelwe