Menzi Magubane
Abaphathi beKaizer Chiefs bazithola besenkingeni enkulu njengoba izinkontileka zabadlali abamqoka abayisishiyagalolunye ziphela ngomhla zingana-30 kuNhlangulana.
U-Itumeleng Khune, uWillard Katsande, uBernard Parker, uLebohang Manyama, uPhilani Zulu, uKhotso Moleko, uRamahlwa Mphahlele, uKhama Billiat kanye noBruce Bvuma bonke izinkontileka zabo ziyaphela kuMakhosi esikhathini esingaphansi kwamasonto amathathu.
Laba badlali bonke babambe iqhaza elibalulekile emidlalweni yeChiefs kule sizini kwi-CAF Champions League. NgoMgqibelo mhla ziyi-19 kuNhlangulana, Amakhosi azobe engekho eyodlala neqembu lase-Morocco, i-Wydad Casablanca emlenzeni wokuqala womdlalo owandulela owamanqamu walo mqhudelwano.
Umlenze wokubuya uzobanjelwa e-Soweto ngoMgqibelo olandelayo kanti umqeqeshi osanda kuqokwa uStuart Baxter uzothembela kulaba badlali. Uma kwenzeka iChiefs ikwazi ukufinyelela emdlalweni wamanqamu, wonke amehlo azobe ebheke kubaphathi beqembu maqondana nekusasa lalaba badlali.
Owamanqamu uhlelelwe umhla ziyi-17 kuNtulikazi. Abalandeli ngokuqinisekile bazobe bekhathazekile bebuza ukuthi ngabe laba badlali basazoqhubeka yini babengabadlali beChiefs kowamanqamu.
Amakhosi anesinqumo esikhulu okumele asenze ngesikhathi esincane, abaphathi beChiefs bangaphoqeleka ukuthi bagcine abanye babadlali ukuze bakwazi ukudlala kowamanqamu.
Kulesi sigaba somncintiswano, amaqembu awavunyelwe ukufaka abadlali abasha. Abadlali abafana noMphahlele noBilliat basenayo inketho yonyaka owodwa ezinkontilekeni zabo iChiefs esengayisebenzisa.
Imibiko iphakamise ukuthi uKhune, uParker kanye noManyama kungenzeka baqhubeke nokuhlala e-Naturena, kanti uBaxter udinga amava abo ukwakha Amakhosi amasha. Abavikeli uMoleko noZulu kuthiwa basendleleni yokuphuma nezinkontileka zabo kungenzeka zingavuselelwa.
Akukacaci namanje ukuthi ikusasa liphetheni ngoKatsande noBvuma, okuzwakala ukuthi bafunwa yiMamelodi Sundowns. Kodwa-ke uBaxter uzoba nezwi lokugcina ekutheni yini okufanele kwenzeke kubo bonke laba badlali.
Umsebenzi wakhe ukuvuselela Amakhosi futhi ukwenza njalo uzodinga ukuletha igazi elisha nokukhipha elidala.
Umthombo wesithombe: @kaizerchiefs