Dylan Bettencourt
Umbhikisho wakamuva wokuphanga nokucekela phansi izinto kulindeleke ukuthi udle idolobha laseThekwini imali engaphezu kwezigidigidi ezingama-R20.
Imenenja yedolobha ebambile kumasipala weTheku, uMusa Mbhele, ithe ukulinganisa kwamanje kukhombisa umonakalo ongaphezu kwezigidigidi eziyi-R15 kwimpahla nezinto zokusebenza, bese kuba isigidigidi esi-R1 esilahlekile kwisitoko kubalwa nokuthinteka kwabadayisi abangekho emthethweni abayi-55 000 kanye namabhizinisi asemthethweni ayi-40 000.
“Umthelela ophelele wokulahleka kwemali kulindeleke ukuthi ukhuphuke ube ngaphezu kwezigidigidi ezingama-R20. Imali yedolobha elahlekile ngesonto lokuqala lezinxushunxushu ilinganiselwa kwizigidi ezingama-R50 ebese kuthi imali engenayo ibe ngaphezu kwezigidi ezingama-R300.”
Abezomnotho nabahlaziyi babikezela ukulahleka okungu-0.4% kuya ku-1.0% ku-GDP yesizwe yangowezi-2021.
Ukucekelwa phansi kwempahla kulandela imibhikisho yemizamo yokuba owayenguMengameli wezwe uJacob Zuma adedelwe ejele izinyanga eziyishumi nanhlanu agwetshwe zona, kodwa umkhakha wezokuthengisa kulindeleke ukuthi ubhekane nemiphumela emibi kakhulu.
I-Bureau for Economic Research ithe: “Umthelela omkhulu futhi oqonde ngqo kwi-GDP kuzoba ukwehla kwesibalo samakhasimende nokukhiqizwa kwezimboni e-KZN njengoba bekwenzeka e-Gauteng kuleli sonto eledlule.”
UMengameli uCyril Ramaphosa ngesikhathi evakashele eKZN uthe umsebenzi wezomnotho ufinyelela emazingeni ajwayelekile ngokuvulwa komgwaqo omkhulu u-N3. Kuleli sonto kubuye kwabonwa abakwa-Transnet beqhubeka nokusebenza kwabo kwezitimela.
Ibhange Lombuso laseNingizimu Afrika lizomemezela amanani okubolekwa ngemali ngoLwesine okuzophinde kukhombise izindleko ezidalwe ubugebengu.
Umthombo wesithombe: @SAPeople
.
