UCelani Sikhakhane ukulethela izindaba zakamuva zaKwaZulu-Natal.
E-UKZN: I-Astronomer Royal esanda kuqokwa e-United Kingdom, okuyisikhundla esihloniphekile sokweluleka iNgonyama yamaNgisi ngezifundo zezinkanyezi, ubengumfundi waseNyuvesi yaKwaZulu-Natal (UKZN) uSolwazi Michele Dougherty. Ungusolwazi e-Imperial College eLondon, lapho azakhele khona ikusasa lakhe iminyaka engaphezu kwengu-35 ohlanganise nokuhola amathuluzi emagnetometer emishini ye-Cassini/Huygens eya kuSaturn kanye ne-Jupiter Icy Moons Explorer ye-European Space Agency.
Kule ndima ehloniphekile, u-Dougherty uhlela ukugxila ekufinyeleleni, ukubandakanya umphakathi kwezesayensi yezinkanyezi nesayensi, kanye namandla ayo okunikeza imbuyiselo yangempela yomnotho wase-UK.
UDougherty nodadewabo bazalelwa eGoli, bakhulela eThekwini, lapho ubaba wabo ongasekho, uSolwazi Brian Dougherty, asebenza eminyangweni yezobunjiniyela bomphakathi e-University of Natal nase-University of Durban-Westville, eyiNhloko yoMnyango ekugcineni.
EMgungundlovu: Abagwetshwe ngamacala okubulala ahlobene nemboni yamatekisi, uMuzi Sibiya (42) noNduduzo Shezi (36), bagwetshwe udilikajele umuntu ngamunye kanye neminyaka engu-80 bebhadla ejele eNkantolo yesiFunda yaseMgungundlovu ngoLwesihlanu,mhlaka- 29 kuNcwaba 2025. Laba bobabili batholwe benecala lokubulala nelokugebenga.
Ngomhlaka-4 kuNtulikazi 2022, uSibiya noShezi, kanye nabanye abasolwa abane, bagasela eposini eTugela Ferry Mall eMsinga bagebenga abasebenzi isamba semali esingadalulwanga okwakufanele ikhokhelwe abahlomuli bakwaSASSA. Abasolwa baphinde bantshontsha nezimpahla zabasebenzi ababili, ijakhethi nomsakazo kunogada.
EDurban: IMeya yeTheku uKhansela Cyril Xaba wethule uhlelo lwenyanga yeSpring Clean-Up eGlenugie Park ePinetown, okuwuphawu lokuqala kochungechunge lwemisebenzi okuhloswe ngayo ukugqugquzela indawo ehlanzekile, enempilo futhi esimeme. Lolu hlelo luyingxenye yomkhankaso omkhulu wokugqugquzela ukuzibandakanya kwezakhamizi ekugcineni imiphakathi ihlanzekile futhi iphephile.
Ekhuluma ngesikhathi kwethulwa umkhankaso wokuhlanza, iMeya uXaba ithe lolu hlelo lungaphezu nje kokuqoqwa kwemfucuza. “Kumayelana nokubuyisela izindawo ezihlanganyelwe, ukubuyisela isithunzi emiphakathini, kanye nokuvuselela umoya wokuzibophezela ngokubambisana osichaza njengabantu baseNingizimu Afrika,” usho kanje.
Esithombeni esingenhla: INyuvesi yaKwaZulu-Natali eThekwini igubhe ukuqokwa komfundi wayo owayengumfundi uSolwazi Michele Dougherty njengeNgonyama yaseNgilandi i-Astronomer Royal.
Umthombo wesithombe: UKZN