UCelani Sikhakhane ukulethela izindaba zakamuva zaKwaZulu-Natal.
EMlazi: I-ANCWL esiFundeni saseThekwini igubhe inyanga yabesifazane ngokunikela ngezicathulo zesikole ezikoleni ezahlukene zaseMlazi, eningizimu yeTheku. Kulo mcimbi obungeSonto iningi labafundi abancane lithole izipho zezicathulo ngesikhathi i-ANCWL izama ukuvuselela amandla e-ANC esiFundeni saseThekwini. Lokhu kuza ngemuva kokuthi i-ANC ilahlekelwe amandla kulesi sifunda ngesikhathi sokhetho lukazwelonke ngo-2024. Lo mcimbi ubuhanjelwe ngowayenguNgqongqoshe wezemiSebenzi yoMphakathi KwaZulu-Natal uDkt Ntuthuko Mahlaba kanye namalungu eThimba eliQeqeshayo lesiFunda saseThekwini.
EZululand: Ekuseni ngeSonto amaphoyisa KwaZulu-Natal abophe umsolwa oneminyaka engu-42 KwaNongoma ngecala lokutholakala nezibhamu ezine ezingekho emthethweni nezinhlamvu. Amaphoyisa eZululand District Task Team naweCrime Intelligence athole imininingwane ethembekile ngomuntu waseGwabe KwaNongoma onezibhamu ezingekho emthethweni. Umsolwa utholwe ngaphakathi endlini kanti ngesikhathi amalungu esesha athola isibhamu i-303 esixhunywe ne-scope, i-AK47, i-Uzzi kanye nesibhamu sohlobo lwe-9mm. Izibhamu zitholwe ngaphansi komatilasi wombhede abelele kuwona. Umsolwa akakwazanga ukuveza ilayisensi yanoma yisiphi isibhamu esitholwe endlini yakhe.
EMpendle: I-DA isichaze ukuvakasha kukaNgqongqoshe wezokuHlaliswa kwaBantu kulabo abakhahlanyezwe yizikhukhula ngo-2022 njengokubambezeleka ngendlela engamukelekile. “Yize i-DA ikwamukela lokhu kungenelela osekunesikhathi eside kwenzeka, ukusabela kukaNgqongqoshe wezokuHlaliswa kwaBantu kuzwelonke kuthathe isikhathi eside ngendlela engamukelekile. Ukuza kuphela eKZN manje – ‘ezokwethula usonkontileka’ futhi anikeze isibalo esincane sezindlu – kuwukwehluleka okukhulu kobuholi kanye nokubusa,” kusho i-DA.
Esithombeni esingenhla: I-ANCWL esifundeni saseThekwini igubhe inyanga yabesifazane ngokunikela ngezicathulo zesikole ezinganeni zaseMlazi, eningizimu yeTheku.
Umthombo wesithombe: ANCWL