UCelani Sikhakhane ukulethela izindaba zakamuva zaKwaZulu-Natal.
E-Durban – INational Freedom Party isixoshe uNobhala Jikelele wayo ngemuva kokumthola enecala lokungaziphathi kahle. UMnuz Teddy Thwala uxoshwe kuNFP ngemuva komhlangano wekomiti lokuqondisa izigwegwe ngeSonto eThekwini. Kuke kwabakhona ukungezwani phakathi kwakhe noMengameli we-NFP u-Ivan Barnes kwazise bobabili bawine izikhala engqungqutheleni yokukhetha ubuholi be-NFP. Kulowo mhlangano uThwala ubesekhempini yePhini leMeya yeTheku, uNkk Zandile Myeni, ohlulwe nguBarnes. Esitatimendeni esikhishwe yi-NFP ngoLwesibili, leli qembu lithi selimxoshile manje uThwala.
E-Harry Gwala – ISouth Africa National Civic Organisation (Sanco) isikungcwabile ukungazwani kwayo ne-ANC KwaZulu-Natal. Lokhu kuza ngemuva kokuthi ubuholi beSanco esifundazweni bunqume ukuthumela usihlalo wayo eKZN, uLawrence Dube, emcimbini we-ANC obuseHarry Gwala District ngempelasonto. Lokhu kuqubule intukuthelo njengoba ubuholi beSanco bubhalele i-ANC eKZN “incwadi yokuhlukanisa” bethi lobu budlelwano bungumbombayi futhi bugcwele izinkinga.NgoLwesibili iSanco ithe sebexolelene ne-ANC ngemuva kokungenelela kukaNobhala Jikelele we-ANC uFikile Mbalula ngempelasonto.
Umkhanyakude – Abaholi bomdabu, kanye noNgqongqoshe wezokuThutha nokuHlaliswa kwaBantui KwaZulu-Natal, uSiboniso Duma, bahole uhambo lokubheka inqubekelaphambili yokwakhiwa kabusha kwezivimbi zikakhonkolo ze-Jersey ezakhiwa emngceleni waseNingizimu Afrika/Mozambique ukuze kunqandwe ubugebengu obunqamula imingcele. Abaholi bomdabu bakwaTembe nabakwaGumede bathi bawuthakasele kakhulu umsebenzi osuwenziwe kuze kube yimanje futhi bajabule ngemizamo yokunqanda ukuhamba ngokungemthetho kwezimoto ezebiwe eziwela umngcele ziye eMozambique. UDuma uthe sekusebenze imali elinganiselwa ku-R62-million ku-Phase 1 kanti umsebenzi usazoqhubeka ku-Phase 2. Ngokuhamba kwesikhathi, iMeya yesifunda saseMkhanyakude uMnuz Siphile Mdaka noDuma bavakashele esiqhingini saseNkovukeni ukuyolungisa usizi lwabantu abangakwazi ukuthola usizo ngenxa yomfula ozungeze indawo.
Empangeni – Kuthathwe izibhamu ezintathu kwaboshwa umsolwa ezintatha zangoLwesibili emkhankasweni wophiko lweProvincial Operational Response Services, Public Order Policing, Empangeni kanye naweCrime Intelligence. EDondotha kuboshwe umsolwa(30) otholwe nesibhamu nezinhlamvu eziyishumi nane. Uphenyo luveze ukuthi isibhamu ngesophiko lwamaphoyisa futhi asikaze sinikezwe iphoyisa. Awekho amarekhodi akhombisa ukuthi kuke kwabikwa ngesibhamu silahlekile noma esebiwe. Lo msebenzi uqhubekile waze wayofika emzini waseDondotha lapho kutholwe khona isibhamu esinezinhlamvu eziyishumi nanhlanu sigoqwe ngesikibha sifihlwe kusofa endlini engakhiyiwe. Lesi sibhamu sigunyazelwe owesilisa(38) ubudala, sishaqwe ngezizathu zokungalandeli umthetho wokuphatha nokulawula isibhamu.
Esithombeni esingenhla: I-NFP isixoshe uNobhala Jikelele wayo uMnuz Nhlanhla Teddy Thwala ngemuva kokutholwa enecala lokungaziphathi kahle.
Umthombo Wesithombe: X