UCelani Sikhakhane ukulethela izindaba zakamuva zaKwaZulu-Natal.
KwaNongoma –UNgqongqoshe wezokuBusa ngokuBambisana neziNdaba zoMdabu KwaZulu-Natal (Cogta), uMfundisi Thulasizwe Buthelezi, uthi i-Cogta nababambisene nayo bazokwakhela imindeni engu-9 e-Ophiyaneni, KwaNongoma imizi emisha eyakhahlanyezwa ukudilika komhlaba kwavuleka umgodi omkhulu. UButhelezi uveze lokhu ngemuva kokuhambela imizi ecekeleke phansi ngoMsombuluko. Ufike wabona ukuthi ungakanani umonakalo wathola nokuthi umndeni wakwaMbatha ulahlekelwe izindlu ezintathu. Ukuvuleka komgodi kuphinde kwalimaza izindawo ezimbalwa eziseduze. Ujoyinwe yimeya yaseZululand, ukhansela uKhumalo, neMeya yakwaNongoma, ukhansela Ndabandaba. Imizi emisha izokwakhiwa ngosizo oluvela kwa-Old Mutual, i-Red Cross, i-Al Imdaad Foundation kanye neThemba Njilo Foundation.
Ethekwini – NgoMsombuluko, idolobha laseThekwini lethule umkhankaso walo wokuvakasha ngePhasika nezinsuku zasebusika, obizwa nge-Endless Fun Season. Lo mkhankaso uzofaka izinto eziningi ezizokwenzeka eThekwini okubalwa izimpophoma, ama-safaris kuya ezimakethe, izitolo nasemicimbini yamasiko. Zibalelwa ku-1.3-million izivakashi okulindeleke ukuba zivakashele eThekwini ngephasika. Ukubhukha amahhotela kulindeleke ukuthi kufinyelele ku-63%, kusuka ku-50% ngonyaka odlule.
EThekwini – Angaphezulu kuka-20 amazwe angamalungu e-G20 abe yingxenye yomhlangano wezinsuku ezine eThekwini obugxile ekunciphiseni izinhlekelele. Lo mhlangano ubuseNkosi Albert Luthuli International Convention Centre. Izihambeli zibheke indlela yokusebenzisana ukuze kulungiselelwe kangcono futhi kubhekwane nezinhlekelele zemvelo. Babelane ngamasu okuthi bangabhekana kanjani nezimo eziphuthumayo okuhlanganisa ukuvikela, ukuzilungiselela, ukuphendula ngokushesha kanye nokululama.
Esithombeni esingenhla: Umphakathi waKwaNongoma owalahlekelwa yimizi yawo ngemuva kokuvulela komgodi omkhulu.
Umthombo wesithombe: KZN Cogta