Lubhalwe nguRorisang Modiba
Inkampani kaSomizi Mhlongo ikweleta u-R165,402 womholo wabasebenzi, kanti i-CCMA isitshele inkantolo ukuthi izidayise izimpahla zayo.
Abasebenzi bathi baxoshwa ngaphandle kwesixwayiso ngoMbasa futhi abakaze bakhokhelwe yize i-CCMA ivune bona.
IKhomishana ye-Conciliation,Mediation and Arbitration, iyalele inkantolo ukuthi ishaqe futhi idayise impahla yenkampani ephethwe ngusaziwayo kanye nejaji lama-Idols, uSomizi Mhlongo.
Lo myalelo uza ngemuva kokuthi inkampani, i-Search Light (Pty) Ltd, ihlulekile ukukhokhela abasebenzi bayo imali engaphezu kuka-R165 000.
USomizi nozakwabo kwezamabhizinisi uLindo Maleho basohlwini lwabaqondisi benkampani yokuhlanza, eyayinabasebenzi abasebenza kwa-Transnet e-Carlton Centre.
Ngokusho komunye wabasebenzi bakudala baxoshwa isigubhukane ngoMbasa bengachazelwanga lutho. “Sisanda kuphelelwa yimisebenzi kungazelelwe,” kusho isisebenzi, kubika i-Sunday World. “Sibe sesidlulisela udaba kwa-CCMA banquma ukuthi kumele sikhokhelwe uMbasa, uNhlaba noNhlangulana.”
Kodwa ngisho nangemva kwesinqumo, imali ayizange ikhokhwe.
I-CCMA yabe isikhipha incwadi ngomhlaka-23 kuNhlangulana, inika usherifu imvume yokuthatha izimpahla enkampanini azidayise endalini yomphakathi ukuze kuqoqwe imali ekweletwayo.
Umyalelo osemthethweni wakwa-CCMA uthi: “Ungathatha izimpahla zenkampani uzidayise ukuze uthole u-R165,402.62 kanye nenzalo. Le mali kufanele inikezwe umsebenzi.”
UThabiso Putswe we-Hetelicca Trade Union uthe: “USomizi nozakwabo baphule inkontileka ababenayo nabasebenzi, siyajabula ukuthi kwenziwa ubulungiswa.”
I-CCMA isaphenya icala lokuxoshwa ngokungafanele.
USomizi, uMaleho nabammeli babo abakaziphenduli izicelo zokuthi baphawule.
Esithombeni esingenhla: USomizi.
Umthombo wesithombe: @somizi