Izimoto ezidingwa ngamaphoyisa zihleli azisetshenziswa ziqoqa uthuli

Kabelo Tlhabanelo

Ngesikhathi amaphoyisa ase-Bloemfontein ekhala ngezimoto zamaphoyisa ukuthi zenze umsebenzi wazo, uNgqongqoshe wamaPhoyisa uBheki Cele uzizwile izicelo zabo.

Uzihambisele mathupha izimoto eziyi-100 kubo.

Kodwa lokho kwakungoZibandlela ngonyaka owedlule kanti izimoto azikasetshenziswa. Zihleli azisetshenziswa, zihleli phandle obala, azimbozwe ngalutho futhi ziqoqa uthuli.

Izimoto ezibekwe endaweni yase-Bains Vlei kubalwa ama-BMW, amaveni akwa-Nissan NP300, ama-VW Polo namaveni amaphoyisa. Zonke kufanele zisetshenziselwe ukulwa nobugebengu.

Amaphoyisa atshele i-Scrolla.Africa ukuthi abaseshi badonsa kanzima kakhulu.

“Siyaphoqeleka ukuthi sabelane ngezimoto, kwesinye isikhathi ozakwethu bathatha isikhathi eside ukuqeda umsebenzi wabo bese bevumela abanye ukuthi basebenze,” esho.

Elinye iphoyisa lithe: “UBheki Cele ubone kunesidingo sokuthi asinikeze lezo zimoto ukuze sikwazi ukusebenza. Kodwa abaphathi bethu bafuna ukuzigcina sengathi izimoto zabo uqobo. Yize kunjalo bafuna ukuthi sisebenze futhi abafuni ukuzwa izaba.”

Elinye iphoyisa lithe amathayi ezimoto ezimile azobola uma zingasetshenziswa.

“Kuzoba ezinye izindleko ukulungisa lezi zimoto. Ngeke ngimangale uma kungathiwa amagundane adle amakhebuli kagesi,” esho.

“Kunehlathi eliseduze nalapho okubekwe khona izimoto. Kungaba nezinyoka ngaphakathi kulezo zingxenye zezinjini.”

Amaphoyisa athe iningi lezimoto zawo zisalinde ukulungiswa egaraji likahulumeni.

Okhulumela amaphoyisa uBrigadier Motantsi Makhele uthe izimoto ezintsha zigcinelwe uma kwenzeka lezi izimoto ezindala zibandakanyeka ezingozini.

“Le ndawo iyindawo yokugcina izinto. Kodwa izimoto zabiwa ngezikhathi ezithile. Iziteshi zizoba nezinsizakusebenza ngemuva kokulungisa izingqinamba ezisegalaji,” kusho uMakhele.

Scrolla World Cup Quiz