Linda Ximba
Lesi sikhundla esisanda kukhethwa se-SA National Boxing Organisation sikhethwe eMhlanganweni Jikelele Wonyaka ngoMgqibelo, obubanjelwe e-Kempton Park eGoli.
Kuze kube manje, bekukhona uhlaka lwesikhashana obelukhona ngemuva kokusula kobuholi obudlule ngoNdasa ngonyaka odlule.
Ubuholi obudlule, obabuholwa ngu-Andile Mofu, bushiye phansi izintambo ngemuva kokuba iNingizimu Afrika yehlulekile ukuthumela iqembu emidlalweni yokuhlungela ama-Olimpiki e-Senegal.
Ngenxa yokungakwazi ukusebenza kombuso wangaphambilini, iNingizimu Afrika ngeke imelwe esibhakeleni kuma-Olimpiki azayo e-Tokyo. Kuzobe kungokwesibili kulandelana izwe lingaqhudelani kulo mdlalo.
Manje, ngaphansi kukaMengameli omusha uSiyabulela Mkwalo, izinto sezizoshintsha njengoba sebethathe isinqumo sokulungisa amaphutha ngokuzibekela imigomo yama-Olimpiki ase-Beijing nama-Commonwealth Games.
“Kubalulekile ukuthi sifingqe imikhono sisebenzisane ekuboneni izinkinga ezikhungethe inhlangano. Kumele sihambe ngendlela eyodwa ngenxa yabashayisibhakela abathembele kithina ekuqinisekiseni ukuthi sibahola kahle ukuze bakwazi ukumela izifunda zabo kuze kufike ezweni emicimbini emikhulu,” kusho uMkwalo wase-Western Cape.
Iphini lakhe likamengameli nguHarzet Hlophe, kanti uLiwa Mlokoti unguNobhala Jikelele, iphini likanobhala u-Onalena Tsae, uMgcinimafa nguMandla Ndlovu kwathi isikhundla se-PR sanikwa uMakhosazana Shabangu.
Isigungu esedlule besisolwa ngokungaphathi ngendlela imali yesikhwama eyizigidi eziyi-R10 lowo owayenguNgqongqoshe wezeMidlalo ayifaka kusoseshini ukuze aqhube umsebenzi kazwelonke ohlose ukukhiqiza abashayisibhakela abazoncintisana kuma-Commonwealth Games, e-Gold Coast Australia ngowezi-2018 nakuma-Olimpiki azayo.
Ngemuva kwesikhashana kuqinisekisiwe ukuthi iNingizimu Afrika ngeke ikwazi ukuthumela abashayisibhakela kuma-Olimpiki, sonke isigungu esiphezulu seSanabo sesulile sisho ukithi “izimo zokusebenza ezingabekezeleleki” ngoNdasa ngonyaka odlule.