Lubhalwe nguBuziwe Nocuze
Imindeni ithi iphoqeleka ukuthi ithenge amaphilisi ezinhlungu kanye nemithi emakhemisi ngesikhathi izithandwa zayo zilindile ngaphandle kosizo esibhedlela saseKhayelitsha District.
Abaphathi besibhedlela bayakuvuma ukushoda kwabasebenzi nemibhede, bathi izehlakalo zokuhlukumezeka kwangempelasonto nokuhlala isikhathi eside kwenza ukuminyana kube kubi kakhulu.
Iziguli zaseSibhedlela Sesifunda saseKhayelitsha eKapa ziphoqeleka ukuthi zilale phansi ngenxa yokuthi imibhede ayenele.
Esinye isiguli esicele ukuthi igama laso ligodlwe sithe sangeniswa ngoLwesihlanu lwesonto eledlule sachitha impelasonto yonke silala phansi.
“Isimo sibi, bengilala phansi abanye ezitulweni benganakiwe, ufika esibhedlela ugula ufike sibe sibi kakhulu isimo usalinde ukusizwa,” kusho bona.
Eminye imindeni inqume ukuyisa abathandiweyo bayo emakhaya ngaphandle kokwelashwa. Abanye bathenge amaphilisi ezinhlungu neminye imithi emakhemisi ukuze balethele izihlobo zabo ezilindile ngaphakathi esibhedlela.
“Indlela abasebenza ngayo yimbi futhi esikhundleni sokuthi izinto zibe ngcono zibheda kakhulu,” kusho uNandipha Godlwana oneminyaka engu-45 ubudala. “Ukuyisa izihlobo zakho kuleso sibhedlela kuyakhathaza, abasebenzi benza kancane futhi bahlala bekhala ngokushoda kwabasebenzi, abantu bayagula belinde ezitulweni belala phansi.”
UNandipha uthe ngenyanga edlule kudingeke ukuthi abuke udadewabo ogulayo elele kuma-tiles esibhedlela. “Ama-tiles ayabanda futhi enze izinto zibe nzima kakhulu kuye. Akwamukelekile.”
Okhulumela isibhedlela u-Abulele Dyasi uthe ukuminyana kwabantu kuyinkinga enkulu ikakhulukazi ngezimpelasonto lapho kwanda iziguli ezihlukumezekile nodlame.
“Isibhedlela sisebenzela umphakathi omkhulu futhi okhulayo futhi abasebenzi bethu bangaphansi kwengcindezi enkulu. Ngeshwa, umthamo omkhulu weziguli ezifuna usizo oluphuthumayo nezidinga ukulaliswa ewodini lethu lezokwelapha zithinta izikhathi zokulinda kweziguli,” kusho uDyasi.
Ubuye wengeza ngokuthi isibhedlela sishoda ngabahlengikazi abakhethekile kodwa sizama ukugcwalisa izikhala nokuletha abasebenzi abavela ezikhungweni eziseduze. Uvumile ukuthi ezinye iziguli zigcina zilindile ezihlalweni noma kuma-stretchers kuze kutholakale imibhede.
“Ukubambezeleka kokuthola umbhede kuphinde kudale ukuthi iziguli zidinge ukunakekelwa isikhathi eside ngaphambi kokuthi zihambe ziphephile, okwehlisa amandla ethu okwamukela iziguli ezintsha,” kusho uDyasi.
Uxwayise imindeni ukuthi ingazisusi iziguli noma ilethe eyazo imithi ngaphandle kokukhuluma nabasebenzi basesibhedlela ngoba lokho kungadala ubungozi obukhulu.
Esithombeni esingenhla: Iziguli zasesibhedlela sesifunda saseKhayelitsha ziphoqeleke ukuthi zilale phansi ngenxa yokuminyana.
Umthombo wesithombe: Sithunyelwe