Lubhalwe ngu-Everson Luhanga
Baphinde baboshwa abasolwa abathathu okukholakala ukuthi bayingxenye yeqembu lezigebengu ezihlukumeza abantu e-Gauteng. Baboshwa nje kade bededelwe ezitokisini zamaphoyisa ngendlela engaqondakali ngaphambi kokuba bavele enkantolo.
Laba bobathathu bake baboshwa ngezinsuku ezihlukene ngoNhlaba nangoNtulikazi ngemuva kokukhishwa esitokisini samaphoyisa e-Hillbrow ngoMfumfu nyakenye, kulandela ukudubulana namaphoyisa.
Okhulumela amaphoyisa esifundazweni sase-Gauteng, uKaputeni Tintswalo Sibeko, uthe uphenyo luyaqhubeka mayelana nokuthi kungani abasolwa abathathu bededeliwe.
NgoMfumfu nyakenye, amadoda amahlanu agqekeza umuzi ose-Primrose, e-Germiston. Abathathu kulaba ababoshwa badedelwa bengakaveli enkantolo bahlonzwa njengengxenye yeqembu lezigelekeqe i-JMPD eyababopha ngemuva kokushayisa imoto yabo esontweni ngoMfumfu nyakenye ngemuva kokugebenga umuzi.
Laba bobathathu kusolakala ukuthi bayingxenye yeqembu lezigelekeqe ezinhlanu elagqekeza emzini wephoyisa ose-Germiston elisebenza ophikweni olulwa nobugebengu esiteshini samaphoyisa e-Hillbrow ngomhlaka-22 kuNdasa.
Omunye wabasolwa wabamba enye yamadodana ephoyisa wadubula iphoyisa emlenzeni, esabisa ngokubulala umfana (12), uma iphoyisa lingabaniki abakufunayo. Iphoyisa lazinikela, la madoda abe esephanga umuzi.
Amacala amabili okuzama ukubulala nelokugebenga abhaliswe esiteshini samaphoyisa e-Germiston ukuze aphenywe. Iphoyisa lahlala esibhedlela izinsuku ezinhlanu ngaphambi kokuthi likhishwe. Namanje lisesekhaya, liyelulama ekulimaleni kwalo.
Iphoyisa libone abanye abasolwa ezithombeni ze-CCTV emzini walo.
Umsolwa oyedwa waboshwa ngomhlaka-28 kuNhlaba. Emuva kokumphenya amaphoyisa athole ukuthi ubefunelwa amacala angu-40, okubalwa awokugebenga izindlu, ukuntshontsha ubucwebe nelokuzama ukubulala.
Usanda kuphuma ejele ngoshwele. Ngokusho komthombo wamaphoyisa ongeke udalulwe, umsolwa uvame ukufumbathisa ukuze aphume esitokisini ngaphambi kokuba avele enkantolo.
Umsolwa wesibili, owadubula iphoyisa e-Germiston, kulandelwe umkhondo wakhe waboshwa ejele laseGoli ngomhlaka-12 kuNtulikazi.
Uboshelwe icala lokudubula abulale unogada e-Maboneng, enkabeni yeGoli. Ubefunelwa necala lokudubula umuntu eThekwini wabalekela eGoli.
Umsolwa wesithathu waboshwa mhlaka-18 kuNtulikazi ngemuva kokuthweswa icala nelinye iqembu lezigebengu ezingaphezu kuka-15 ezantshontsha e-Cash Crusaders e-Honeydew.
Iqembu lezigebengu leba ama-laptop, omakhalekhukhwini, ubucwebe nezinye izinto ezibalulekile. Amaphoyisa asebenzise umakhalekhukhwini one-tracker alandela umkhondo wabo, baboshwa e-Hillbrow.
USibeko ukuqinisekisile ukuthi amaphoyisa aphenya amacala okugebenga nelokuzama ukubulala. Abasolwa abathathu bavele eNkantolo yeMantshi yase-Hillbrow ngoLwesine, mhlaka-1 kuNcwaba.
Esithombeni ngenhla: Abasolwa abathathu abaziwa ngokuhlasela izingxenye ezithile ze-Gauteng.
Umthombo: Uthunyelwe