Lubhalwe nguSihle Mavuso
Izicishamlilo zikamasipala wesifunda iZululand zisukume ngokushesha ngeSonto ebusuku ukuyohlenga isigodlo saKwaPhindangene oLundi emlilweni.
Lesi sigodlo sihlala umndeni kaMntwana uMangosuthu Buthelezi ongasekho, owayengundunankulu wesizwe samaZulu, owakhothama ngoMandulo nyakenye.
Umlilo uqale endaweni yaseMahlabathini wadlulela nasezifundeni eziningi okubalwa nasoLundi.
Okubuhlungu wukuthi umlilo udlule nomphefumulo kaMuntu Gazu waseShowe, endaweni eqhele ngamakhilomitha angu-100 ukusuka oLundi.
Umbiko ovela kwabezinhlekelele esifundeni saseZululand uchaza kabanzi ngezigameko zomlilo. OLundi nje kuphela kukhahlamezeke imindeni engu-11 ngenxa yomlilo.
UMnuz Mpikayise Buthelezi oyibamba lenkosi yesizwe sakwaButhelezi usiqinisekisile lesi sigameko wachitha amahlebezi okuthi ithuna likaMntwana uButhelezi lonakele.
“Umlilo ushise insimu yezithelo namapayipi okuchelela azungeze isigodlo kuphela, futhi izicishamlilo ziwunqandile,” usho kanje.
Ithimba lezinhlekelele lesifunda liphinde lasabela emlilweni oqubuke esigodlweni sakwaLinduzulu KwaNongoma.
Baphinde banqanda umlilo endaweni yokugcina impahla yakwa-Spar enkabeni yedolobha kwaNongoma naKwaZiphethe.
Esithombeni ngenhla: UMpikayise Buthelezi oyibamba lenkosi yesizwe sakwaButhelezi usiqinisekisile lesi sigameko.
Umthombo: Sihle Mavuso