Izibhelu zaseFrance sezikapakele emazweni angomakhelwane

Lubhalwe intatheli ye-Staff

Izibhelu ezimbi kakhulu ezike zahlasela i-France ezaqala eminyakeni engamashumi edlule sezikapakele emazweni angomakhelwane i-Switzerland ne-Belgium kule mpelasonto.

Udlame luqubuke ngesikhathi amaphoyisa edubula elinye ibhungu ngesonto eledlule.

Amaphoyisa abophe okungenani abantu abangu-700 ngobusuku besihlanu bezibhelu ngoMgqibelo ngesikhathi ukuhlaselwa komuzi weMeya yendawo kushiye unkosikazi nendodakazi yayo belimele.

Amadolobha ayisizinda salolu dweshu kubalwa i-Lyon, i-Marseille ne-Grenoble njengoba izingane ezibhikishayo zishise izimoto, zaphanga izitolo, zacekela phansi ingqalasizinda zaphinde zalwa namaphoyisa.

NgeSonto uMnyango wezangaphakathi wase-France umemezele isibalo sesikhashana sabantu ababoshiwe abangu-719 ngobusuku obubodwa uma kuqhathaniswa nabangu-1,300 ababoshwe ngoLwesihlanu ebusuku.

Khonamanjalo, amazwe angomakhelwane i-Switzerland ne-Belgium nawo abone izibhelu ezihambisana nodlame lwase-France.

NgoMgqibelo amafasitela ezitolo eziningi edolobheni lase-Switzerland i-Lausanne aye aphihlizwa ngesikhathi amaphoyisa ehlakaza intsha ebishaya amafasitela ezitolo ngamatshe kanye ne-cocktail ye-Molotov, kusho amaphoyisa. Cishe bangu-12 abantu ababoshwe enhlokodolobha yase-Belgium i-Brussels kanti ziningi izigameko zokushisa eziye zalawulwa.

Kulimale amaphoyisa angaphezu kuka-40, kwashiswa izimoto ezingu-577, kwashiswa izakhiwo ezingu-74 kwaba nemililo engu-871 emigwaqweni nakwezinye izindawo zomphakathi, kusho uMnyango. “Amaphoyisa angu-45000 kanye nenqwaba yabasebenzi bezicishamlilo baye bajutshwa ukuze balawule isimo. Ukufika kwabo kwenze kwaba nobusuku obunokuthula,” bengeza.

Esigamekweni esibi kakhulu ngo-1:30 ekuseni ababhikishi bagqube imoto evuthayo bayifaka emzini kaVincent Jeanbrun oyimeya yase-L’Haÿ-les-Roses amakhilomitha ayisishiyagalolunye eningizimu ye-Paris. UJeanbrun ubesebenza ebusuku ehholo

ledolobha kodwa umkakhe neyodwa yezingane zakhe ezimbili baye balimala ngesikhathi bezama ukubaleka.

“Izolo ebusuku kube yingqophamlando entsha yokwethuka nehlazo,” kubhala imeya yeqembu le-Conservative Les Républicains ekhasini layo laku-Twitter igxeka “isenzo sobugwala obungachazeki”. NgeSonto umshushisi wendawo uthe ukuhlasela kuqutshulwe uphenyo lwecala lokuzama ukubulala.

Udlame olukhulu lwenzeke e-Marseille lapho amaphoyisa asebenzise khona isisi esikhalisa unyembezi aphinde alwa nentsha iningi layo elisakhula ngaphambi kokuhlakaza isixuku enkabeni yedolobha i-Canebière.

Umngcwabo kaNahel M (17) oshone ngoLwesibili ngemuva kokudutshulwa iphoyisa ngesikhathi kunesivimbamgwagqo ububanjwe ngokuthula ngoMgqibelo endaweni yase-Paris, e-Nanterre lapho abehlala khona.

UNahel wase-Algeria owakhulela e-Morocco ubeshayela ngokungemthetho, kusho abashushisi. Umsolwa (38) uboshiwe kanti usagqunywe esitokisini.

Izihloko zakamuva