Lubhalwe nguNdivhuwo Mukwevho
Irenki yamatekisi ebiza u-R275 million e-Thohoyandou isihlale iminyaka eyishumi futhi isiphenduke isizinda sobugebengu nezilwane eziyingozi.
UMnyango wezokuThutha uthembisa ukuthi izophothulea ngo-2026, kodwa abantu bakule ndawo baphelelwe ithemba ngemuva kweminyaka begcina izithembiso zabo.
Irenki enkulu yamatekisi eyakhiwe e-Thohoyandou ngo-R275-million isalokhu imile ingasebenzi kusukela ngo-2013.
Irenki isiphenduke ikhaya lezinyoka nezigebengu esikhundleni sokusiza abagibeli.
Ibhilidi liphakathi kwedolobha kodwa alikaze libone ngisho nelilodwa itekisi elilisebenzisayo. Manje abantu bendawo bafuna izimpendulo mayelana nokumoshwa kwemali yabo yentela.
“Ngiyafisa ukuthi ngelinye ilanga ngikhulume neziphathimandla ezifanele mayelana nale renki ukuze ngibabuze imibuzo evuthayo enginayo njengamanje. izigidi zamarandi ezingasogwini zingashiywa kanjalo, ngaphandle kokusebenza ngisho nosuku olulodwa,” kusho uJames Manyama, olungisa izimoto eduze kwerenki.
Ngonyaka odlule, iScroll.Africa yabika ukuthi leli bhilidi elingenalutho seliphenduke indlu yamayengandodai kanye nendlu yangasese yomphakathi.
Kodwa uMnyango wezokuThutha eLimpopo uthi usizo luyeza.
Okhulumela uMnyango uTidimalo Chuene uthe bazokhangisa ngethenda kule nyanga yokulungisa uhlelo lwamanzi.
“Ibhilidi lizoqedwa ngoNdasa ka-2026 futhi ngeke lidilizwe,” usho kanje.
UChuene uthe onjiniyela balibhekile ibhilidi bathola iminkenke emikhulu. Kodwa abantu bendawo abasazikholwa izithembiso.
Umcwali wezinwele u-Ivy Nemavhulani osebenza eduze kwale renki uthe bajwayele ukubona izinyoka ezinkulu eduze kwebhilidi.
“Le renki yamatekisi ibeka impilo yethu engcupheni. Leli bhilidi liyikhaya lezinyoka ezinkulu futhi zingase ngelinye ilanga zihlasele abanye bethu esisebenza erenki. Izihlahla ezizungezile azinakekelwa futhi azigawulwa,” kusho yena.
Uveze ukuthi inxanxathela yezitolo i-Thavhani eseduzane yakhiwa ngo-2015 futhi iyadlondlobala. “Angicabangi nakancane ukuthi le renki yamatekisi izoke isebenze, sekunesikhathi eside kungenzeki lutho,” usho kanje.
UManyama ukholelwa ukuthi kukhona okungahambi kahle ngokwakhiwa kwayo.
“Engikuzwayo ngabahlali base-Vhembe ukuthi kwasetshenziswa izinto ezisezingeni eliphansi ukuze kwakhiwe leli bhilidi okudale ukuthi kube neminkenke ebonakalayo. Kodwa uma kunjalo, kungani abahloli bengazange bakulungise lokhu ngesikhathi kwakhiwa?
Esithombeni esingenhla: Irenki yamatekisi engasasebenzi.
Umthombo: UNdivhuwo Mukwevho