Elmon Tshikhudo
Izigelekeqe ezimbili bezihlele ukubulala isisulu sazo ngokusishisa, kodwa impilo yowesifazane yasindiswa ngesikhathi kungenelela izakhamizi zendawo.
Abantu ababefuna ukumbulala bashaywa ngezinduku zabo ngesikhathi imoto yabo ithelwa ngophethiloli ishiswa ngesikhathi omunye wabasolwa esasengaphakathi.
Laba basolwa kusolwa ukuthi badlwengule, bagwaza base beshisa ngomlilo lo mfundi oneminyaka engama-21 wase-Vhembe TVET College olashelwa ukulimala kanzima njengamanje.
Kukholakala ukuthi omunye wabasolwa ubethandana nalo mfundi kanti ubudlelwano babo baba muncu.
La balisa babe sebemthumba ngeSonto besuka e-Hamutsha e-Makwarela bahamba naye esebhuthini yemoto yabo baya e-Nzhelele.
Ufakazi obone lesi sigameko wabelane ngale ncazelo ezinkundleni zokuxhumana kwathi abahlali base-Ha-Mphaila bayibona imoto.
Owesifazane kuthiwa wadlwengulwa ngomunye walaba bobabili ngaphambi kokuba agwazwe alahlwe ehlathini.
Ilungu lomphakathi lazise ezinye izakhamizi zakule ndawo, ezibambe la madoda zawashaya.
Omunye wabo ukwazile ukubaleka ngenkathi omunye ebhajwe emotweni lapho izakhamuzi ebezithukuthele zithungela imoto ngomlilo ziyithela ngophethiloli la madoda abehlose ukuwusebenzisa ukushisa isisulu sawo.
Owesifazane olimale kabi uphuthunyiswe esibhedlela kwathi lo wesilisa wasindiswa emotweni ebivutha ngesikhathi kufika amaphoyisa.
UMnu. uJoshua Boko Simango we-South African Youth Congress, ozibonele ngawakhe kwenzeka isigameko, uthe lo wesifazane ushiswe kakhulu ngendlela yokuthi ubengabonakali ukuthi ungubani.
“Ushayiwe futhi usesimweni esibucayi kakhulu. Abasolwa ngabafana bendawo engibazi kahle,” esho.
Okhulumela amaphoyisa ase-Limpopo, uBrigadier uMotlafela Mojapelo ukuqinisekisile ukuthi babophe owesilisa futhi sebeqalise ukuthungatha umsolwa obalekile. Umsolwa oboshiwe ugadwe ngamaphoyisa esibhedlela.
Kuvulwe amacala okuthumba, ukudlwengula nokuzama ukubulala kanti kucelwa noma ngubani onemininingwane ukuthi athinte uDetective Sergeant Thabelo Victor Ndou kule nombolo-071 401 3203, 015 973 5202 noma kule nombolo yamahhala ethi: 0860010111.