Lubhalwe nguDoreen Mokgolo
- UMusa Buthelezi, oneminyaka engu-17, ongumfundi waKwa-Thema, ugubhe ngokwenza kahle emiphumeleni kamatikuletsheni ngokuthola u-100% kwi-Maths futhi wazuza udumo kuzwelonke ezikoleni eziku-quintile 3.
- Ngokunqoba izinselele ezifana nokukhathala, uMusa ubonga impumelelo yakhe ngokwesekwa umphakathi kanye nomndeni wakhe futhi uzofundela i-neurology eNyuvesi yaseKapa.
Ingcweti yezibalo nongumfundi wase-Gauteng ophume phambili esikoleni esisesigabeni sesithathu (quintile 3), uMusa Buthelezi, wamukelwe ngomgubho izakhamuzi zaselokishini lakhe Kwa-Thema eKurhuleni ngoLwesibili.
Lo mfundi oneminyaka engu-17 ubudala ubebuyela ekhaya ephuma emicimbini yokumemezela imiphumela kamatikuletsheni, kuzwelonke nasesifundazweni, kanye nokuhlonipha abaphumelele kakhulu.
Izakhamuzi zimhlangabeze emgwaqeni uMaziya noMojela zicula zibungaza impumelelo yakhe.
UMusa ungowesibili ophase kahle kuzwelonke futhi ungumfundi ophume phambili eGauteng ezikoleni eziku-quintile 3.
Uthole u-92% kwisiZulu uLimi Lwasekhaya, isiNgisi wathola u-91%, i-Mathematics wathola u-100%, i-Life Orientation wathola u-94, i-Geography wathola u-97%, i-Life Sciences wathola u-97% ne-Physical Science wathola u-97%.
Ubonge impumelelo yakhe ngokwesekwa okuhlangene komndeni wakhe, othisha, umphakathi kanye nezikhungo ezizimele.
UMusa utshele i-Scroll.Africa ukuthi waqala ukulungiselela izivivinyo zikamatikuletsheni ngoZibandlela ka-2023.
“Ngalanda futhi ngaqoqa amaphepha emibuzo adlule, kwathi uma ngifika ekupheleni kwethemu yokuqala ngase ngiqedile ngokuningi.
“Bengiphinde nginikeze izifundo zamahhala kwabanye babangani bami futhi ngihlanganyele nabo ngezinto ezintsha ebengihlangana nazo ngesikhathi socwaningo lwami ukuze ngithole izixazululo zokuxazulula izinkinga zezibalo,” esho.
Ngaphambi nje kwezivivinyo zakhe zokuqala, waqala ukuphathwa ikhanda (migraines) njalo ehlale ezizwa ekhathele.
“Odokotela banghlola kodwa abatholanga lutho olungalungile kimina.
“Ngangikhathazekile ngesimo sami ngase ngiqala ukucwaninga nge-migraine nezimbangela zayo. Ngabe sengiyithanda i-neurology futhi nganquma ukufundela lo mkhakha.”
Wamukelwe ukuthi ayofundela ubudokotela eNyuvesi yaseKapa futhi uhlela ukwenza izifundo ze-neurology ukuze kamuva asebenze njengomcwaningi wezokwelapha.
Ophumelele kakhulu uncome impumelelo yakhe ngokwesekwa okuhlangene komndeni wakhe, othisha, umphakathi kanye nezinkampani ezizimele.
“Yize ngiphuma endaweni ehlwempu, angikaze ngizizwe ngintula okuthile okuhlobene nezifundo zami.
“Othisha babengikhokhela ukufunda izifundo ezengeziwe; enye inkampani inikele nge-tablet enedatha yanyanga zonke futhi ngokungeseka ngikwazile ukuphuma njengomnqobi,” esho.
Unina kaMusa, uDela Buthelezi, uthe uyaziqhenya ngendodana yakhe.
“Ubesebenza kanzima ubusuku nemini. Ngangihlala naye uma efunda.
“Siyabonga ngakho konke ukwesekwa akutholile.”
Osesithombeni esingenhla: UMusa Buthelezi owenza umatikuletsheni e-Gauteng, nothisha wakhe kanye nekhansela lesigceme.
Umthombo: Doreen Mokgolo