Lubhalwe ngu-Everson Luhanga
Ziyabhebhetheka izinxushunxushu elokishini lase-Diepsloot e-Gauteng njengoba izakhamuzi ebezibhikisha zivale imigwaqo emikhulu zashisa nezitolo.
Zifuna kufike umengameli endaweni yazo.
Izakhamuzi zibhikishela ubugebengu obudlangile endaweni yazo futhi zisola amaphoyisa ngokungasebenzi ngokwanele ukulwa nobugebengu.
Imibhikisho eshubile iqale ngoMsombuluko ebusuku njengoba imigwaqo ibivalwe ngamatshe namathayi avuthayo.
Ngemuva kwamahora izakhamuzi zivusane ngamakhwela ngehora lesine ekuseni ngoLwesibili ukuze ziqhubeke nombhikisho wazo.
Ngehora lesishiyagalombili bekunenqwaba yabantu abebemasha becekela phansi futhi beshisa izitolo endaweni.
Amabhentshi ajikijelwe phansi kwaphinde kwachithwa udoti yonke indawo. Bavale nomgwaqo omkhulu ophithizelayo u-N14 okudale isiminyaminya esikhulu sezimoto.
Abanye abebematasa bedayisa bavale izitolo zabo banyamalala.
Umholi womphakathi uLoyiso Toyiya uthe umbhikisho ubumayelana nokuletha usizo lwamaphoyisa emphakathini.
UToyiya uthe kunenqwaba yamacala abhaliswe esiteshini samaphoyisa e-Diepsloot angakaxazululwa futhi bacela uMengameli Cyril Ramaphosa ukuthi eze ezohlola isimo endaweni yabo.
Umholi wesibili womphakathi, uLefa Nkala uthe izakhamuzi zithathe lesi sinqumo sokubhikisha ngoMsombuluko ntambama. “Sidinga ukuthi kufike uMengameli njengoba enzile ngokuyoxazulula impi yase-Ukraine ne-Russia.
“Siphila njengabantu base-Ukraine njengoba izigebengu zibulala abantu abangenacala. Sidinga uMengameli azokhuluma nathi ngesixazululo mayelana nobugebengu obudlangile okwenzeka emphakathini wakithi,” kusho uNkala.
NgoLwesihlanu olwedlule wona lo mphakathi uzingele wacekela phansi izakhiwo nemijondolo okusolakala ukuthi igcwele abasolwa ngobugebengu.
Uphiko lwamaphoyisa i-National Intervention Unit lwenza lokho abakubiza nge-Operation Restore ezindaweni ezikhungethwe ubugebengu kuleli lokishi. Amaphoyisa athungatha izikhali eziyingozi ezindaweni eziningi okuhlanganisa namathaveni.
Kwenye yamavidiyo ebonwe i-Scroll.Africa, amaphoyisa abonakala egasela kwenye yezindawo zokucima ukoma.
I-Scroll.Africa ikhulume nalowo okhulumela amaphoyisa esifundazweni sase-Gauteng uLieutenant-Colonel Mavela Masando ngoLwesihlanu oqinisekise udaba lokugasela kwabo.
Uthe uphiko lwe-National Intervention Unit lwasungulwa ukuze lubuyise ukuthula ezindaweni ezikhungethwe ubugebengu.
Ngabo lobo busuku iqulu lezigebengu lidubule owesifazane nengane yakhe eneminyaka emine.
Okhulumela amaphoyisa esifundazweni uBrigadier Brenda Muridili uthe ngoLwesibili amaphoyisa azobonakala e-Diepsloot futhi enza konke okusemandleni ukunqanda isihlava sobugebengu.
UMuridili uqinisekise izigameko zokubulala eziyisithupha e-Diepsloot kule nyanga waphinde wabala nokuthi babophe abantu ababhekene namacala ahlanganisa ukuzama ukubulala nokugebenga izindlu, ukushaya i-GBH, i-GBV, udlame lwasekhaya, ukubamba inkunzi kuhlonyiwe kanye nokuqhuba izindawo zokucima ukoma ezingekho emthethweni.
Uthe ngemuva kokubonisana amaphoyisa azohlakaza ngokuthula ababhikishi.