Sizwe Sibiya
Ngemuva kweminyaka emibili, umdlalo owuchungechunge oshisa izikhotha i-Durban Gen, uyaphela ngonyaka ozayo.
Lokhu kuqinisekiswe ngoMsombuluko esitatimendeni esithunyelelwe abazindaba.
Selokhu yaqala ukudlala ngoMfumfu ngo-2020, i-Durban Gen isivuse inqwaba yabalingisi abasafufusa abafana noNelisiwe Sibiya odlala indawo kaDkt Mbali Mthethwa. USibiya, obengumculi ngaphambi kokuthi ajoyine lolu chungechunge, wawina indondo ye-Best Actress in Africa ku-Zikomo Awards nyakenye.
I-Durban Gen, ebukelwa ezweni lonke ngababukeli abangaphezu kwezigidi ezimbili, ayivalwa ngenxa yezinga eliphansi, kodwa yingoba okwamanje lesi siteshi sihlola isikhathi sokudlalwa kwezinhlelo zaso.
“Isinqumo sokuhoxiswa komdlalo wansuku zonke siyingxenye yesu lebhizinisi elihlanganisa ukubuyekezwa okuqhubekayo komjikelezo wempilo osemoyeni wazo zonke izinhlelo zethu,” kuchaza i-e.tv esitatimendeni.