Menzi Magubane
Ngicabanga ukuthi sekuyisikhathi sokuthi uNgqongqoshe wezeMidlalo, ezobuciko namaSiko uMnu Nathi Mthethwa ahloniphe isithembiso asenza kubalandeli bebhola baseNingizimu Afrika.
UMthethwa wathi abalandeli bazovunyelwa ukuthi babuyele ezinkundleni zemidlalo uma sebegonywe ngokugcwele.
Kodwa namanje izinto zisafana njengoba nabalandeli bedidekile futhi bakhungathekile ngokuthi bonke abathintekayo ekuthathweni kwezinqumo bathule.
Lesi sinqumo kumanje sesiphenduke ngokukhombaba ngeminwe phakathi kwe-South African Football Association (Safa) ne-Premier Soccer League (PSL), kanti uMthethwa nguyena kuphela umuntu ongaqeda lokho.
UNgqongqoshe uMthethwa udinga ukuphuma endaweni yakhe yokunethezeka alungise lolu daba ngokushesha.
Izinkundla ezingenalutho zibulala isimilo sabadlali. Njengoba abalandeli bedinga ukubuka amaqembu abawathandayo bukhoma ezinkundleni, abadlali nabo bathembele kubalandeli ukuthi babafakele umfutho njalo uma ukuzethemba kwabo kuphansi.
Amaqembu amakhulu anesisekelo sokwesekwa okukhulu njengeKaizer Chiefs ne-Orlando Pirates awakwazi ukusebenza ngaphandle kwabalandeli bawo. I-Soweto derby isiseduze futhi lamaqembu ase-Soweto azobadinga kakhulu abalandeli bawo.
Imashi ehleliwe enokuthula ye-South African Football Supporters Association (SAFSA) ingahle ibe nodlame maduze uma abalandeli bengavunyelwa ukuthi babuyele ezinkundleni maduze.
Mina ngokwami ngibona kungaba yithuba lokuthi uNgqongqoshe uMthethwa aphumele obala akhulume nabalandeli futhi abakhulule.
Into evule amehlo abalandeli wukuthi ngesikhathi amaqembu ezepolitiki ebambe imikhankaso yawo ngaphambi kokhetho lwangoLwezi, izinkulungwane zabalandeli bezihambele imibuthano yawo.
NgoLwezi, igagasi lesine le-Covid-19 lalisezingeni eliphezulu kodwa lokho akuzange kuvimbe amaqembu ezepolitiki ukuthi abambe imibuthano ngaphambi kokhetho lohulumeni basekhaya lwangomhlaka-1 kuLwezi.
Uhulumeni uphethe ukhiye futhi sekuyisikhathi sokuthi awusebenzise ukuvula izinkundla zemidlalo.
Ngakho-ke, sekusele kuNgqongqoshe uMthethwa ukuthi alalise lolu daba ngokuhlonipha amazwi akhe.
Umthombo wesithombe: @SACricketMag
.
