Ithwele kanzima iBafana ehluleka ukuthola abadlali 

Ukungabikhona kweqembu lakuleli kwindebe ye-Africa Under-20 Nations kuwuphawu olukhathazayo lwezinto ezizayo, kubhala uMichael Madyira.

Ukubuka iNdebe ye-Africa Under-20 Nations Cup eqhubekayo ephethwe i-Egypt kuyisikhumbuzo esikhathazayo sokuthi ibhola lakuleli likuphi njengamanje.

Ngemuva kokuthi elakuleli lingene  emidlalweni yokuhlungela i-Afcon yango-2015, u-2017 no-2019 elandelanayo ka-Under 20, ibikade ingekho emiqhudelwaneni emibili edlule.

Phambilini abadlali ba-Under 20 bekuwona ukhiye obusetshenziswa ekuphakeleni abadlali kuBafana Bafana.

Akungabazeki ukuthi umdlali  ohamba phambili kunabo bonke owake wamela elakuleli kulo mqhudelwano wamaqembu iminyaka uBenni McCarthy owayengumshayi magoli  kuBafana.

Ngo-1997, uMcCarthy waba umdlali omkhulu we-Tournament wathola nomklomelo we-Golden Boot e-Morocco njengoba elakuleli laphuma isibili ngesikhathi somqhudelwano ka-Under 21.

Baqhubeka nokubamba iqhaza kwi-FIFA World Youth Championship ka-1997 nabanye abadlali abafana noStanton Fredericks noMatthew Booth baba izingqalabutho zeBafana.

Ngemuva kweminyaka engu-20, uLuther Singh washaya igoli ku-Afcon bedlala ku-Under 20 e-Zambia – nakuba  esazobekisa indawo yakhe eqenjini lesizwe labadala.

Okungase kube iqembu elikhunjulwa kakhulu kulo mqhudelwano elango-2009 elaphakela iqembu lesizwe labadala okwakukhona nowayengukaputeni weBafana uThulani Serero kanye nesihlabani sakudala se-Ajax Amsterdam,uThulani Serero.

Eqenjini lango-2009 bekukhona uMandla Masango, uGeorge Maluleka, uKamohelo Mokotjo noRamahlwe Mphahlele.

Ukaputeni wamanje weBafana uRonwen Williams wadlala umdlalo wango-2011 owawuphethwe elakuleli kwathi uTeboho Mokoena weMamelodi Sundowns wangena ngo-2017.

Ngemuva kokubuka umgadli we-Burnley, uLyle Foster kanye noNjabulo Blom eNdebeni yoMhlaba ye-FIFA yango-2019 ku-Under 20, kukhombisa ukuthi abadlali abaku-Under 20 bathwele kanzima njengoba bezama ukufinyelela esigabeni esikhulu.

Yini engaba yimbangela yale nkinga engase ibhubhise iqembu lesizwe elikhulu? Akumangazi ukubona uHugo Broos ehluleka ukuqhamuka nesikwati esiqinile.

Selokhu aqokwa njengomqeqeshi weBafana ngo-2021, lo mqeqeshi wase-Belgium usebize abadlali abacishe babe ngu-100 abehlukene njengoba edonsa kanzima ukwakha isikwati esicacile athembele kuso.

Abadlali abaqhamuka ku-Under 20s abamniki lokhu akufunayo futhi lokhu kwenzeka ngesikhathi iBafana Bafana idonsa kanzima ukuthola abadlali abasezingeni eliphezulu.

Isithombe esingenhla: Iqembu lakuleli lika-Under-20 eNdebeni yoMhlaba ka-2019 e-Poland

Umthombo wesithombe: CGTN/Getty

Izihloko zakamuva