Lubhalwe nguDylan Bettencourt
Umhleli wezemidlalo
Ngemuva kwesizini enzima ngaphansi kobunikazi bukaTodd Boehly i-Chelsea isizoqoka uMauricio Pochettino njengomqeqeshi – kodwa ingabe uyindoda elungile ukwakha kabusha iqembu lase-Stamford Bridge?
Leli qembu lase-London selibe nabaqeqeshi abane kulo nyaka futhi lidinga isimangaliso ukuze libuyele efomini yalo.
Ukusesha okubanzi nokwasesidlangalaleni komqeqeshi omusha kuqale ngemuva kokuthi uBoehly enqume ukuxosha uGraham Potter ekuqaleni kwale nyanga.
Okwesikhathi esithile bekubukeka sengathi umqeqeshi wase-Germany, uJulian Naggelsman uzowuthola umsebenzi kodwa leso sivumelwano asizange siphumelele. Bese kubonakala sengathi umqeqeshi wase-Spain uLuis Enrique uzovuma kodwa lezo zingxoxo azizange ziphumelele.
Lokhu kuholele ekutheni uPochettino abeyintandokazi ukuthola lo msebenzi onzima.
Lo mqeqeshi wase-Argentina akayena umafikizolo emaqenjini amakhulu njengoba eseke waqeqesha i-Paris Saint-Germain ne-Tottenham Hotspur.
Lo mqeqeshi (51) ubenza umsebenzi oncomekayo ku-Spurs kodwa wehluleka ukuthola into azoyiveza ngomsebenzi wakhe onzima nokuyinto eholele ekuweni kwakhe eqenjini lase-London. Lolu udaba olungase lube into embi kwi-Chelsea ephila ngokuwina izindebe.
Kwi-PSG wehlulekile ukuphatha abadlali abahamba phambili – okubalwa kubo uNeymar noKylian Mbappe – futhi ekugcineni waxoshwa yileli qembu lase-France. Lokhu kugqamisa enye inkinga engaba khona njengoba isikwati se-Chelsea sinabadlali abaningi abasezingeni eliphezulu.
Ukukhathazeka kwe-Chelsea naphezu kwabalandeli ababonakala bejabule kakhulu ngethemba likaPochettino ukuthi i-Chelsea ibingeyona into yakhe yokuqala. UPochettino ubemagange ukuthatha izintambo kwi-Real Madrid uma uCarlo Ancelotti eshiya indima yakhe.
UPochettino uzoba indoda efanele uma i-Chelsea ikwazi ukumgcina njengomqeqeshi wesikhathi eside nokuthi imibono yakhe inikezwa isikhathi ukuyifeza.
I-Chelsea ithwale kanzima ukushaya amagoli kule sizini kanti “uPoch” waziwa ngokudlala ibhola elihlaselayo eligxile ekuthuthukiseni ithalente elincane.
Uthanda ukuthi iqembu lakhe lakheke kusukela emuva nokuthi lidlale ibhola elihlakaniphile ukuze lehlule izimbangi zalo.
Ngokuzivikela ufuna ukuthi iqembu lakhe liwine ibhola ngokushesha – futhi yilokho kanye okudingwa i-Chelsea ukuze ishintshe imibono yebhola ngokuphelele.
I-Chelsea ibeka ithemba layo kuPochettino onedumela elikhulu kodwa okwamanje kukhona okuncane okuzoboniswa ngakho. Ingabe uBoehly uzomnikeza isikhathi asidingayo ukuze afeze amandla akhe angangabazeki?
Esithombeni esingenhla: UMauricio Pochettino
Umthombo wesithombe: Twitter