Lubhalwe nguCelani Sikhakhane
Umasipala iTheku ligixabeze izintombi zoMhlanga ezisuka kuleli dolobha namaphethelo ngamabhasi angu-20 ukuqinisekisa ukuthi ayikho esala emigwaqweni ngosuku lokuhamba.
Lo masipala ugunyaze isabelo mali sika-R9 00 000 sokukhokhela amabhasi azobe elibhekise oPhongolo, esigodlweni esisha seNgonyama uMisuzulu kaZwelithini eMashobeni ngomhlaka-12 .
Uphinde wakhipha izisebenzi namakhansela azoqinisekisa ukuthi izintombi zaseThekwini ziphephile kulo mkhosi okuhlanganisa nendaba yokudla nokunye.
ITheku lithi lo Mkhosi owenzeka kanye ngonyaka uwuphawu lokuhlonipha nokuqhakambisa amasiko kaZulu Kanye nokujabulisa izintombi nto ezisuke ziziphethe kahle ebuntombini bazo.
Lo Mkhosi owaqalwa iSilo uMpande ngeminyaka yo-1800, uvuselelwe ngonyaka ka-1984 iNgonyama eyebuzile uZwelithini kaBhekuzulu kanye neNdlovukazi uMantfombi Shiyiwe kaSobhuza wakwaKhangela Amankengane.
Lo Mkhosi kuzobe kungokokuqala kusuka mhlaka-12 wenzelwa oPhongolo esigodlweni esisha seNgonyama uMisuzulu kaZwelithini.
Isigagayi samaSiko uDkt Nomagugu Ngobese sithe lokhu okwenziwe iNgonyama uMisuzulu kaZwelithini ukuthutha lo Mkhosi uyiswe eMashobeni ususwa kwaNongoma esigodlweni eNyokeni akuqali ngoba iSilo uma singena esihlalweni asibusi lapho obekubusa khona uyise .
“Angiwazi umsindo ongaka owani ngoba kusuka eMandulo ayikho iNkosi ebibusa phezu kwenye. Ngakho iNdlulamithi yenze okwakwenziwa oKhokho bayo njengoba nayo isinesigodlo sayo esisha eMashobeni,” kusho uDkt Ngobese.
UHulumeni waseKZN ukuqinisekisile ukuthi lo Mkhosi ayikho imali ozoyidla ngaphezu kwalena ebalelwa ku-R12 million ebihlelelwe ukuya eNyokeni.