Lubhalwe nguDylan Bettencourt
ISundowns ibizimisele kakhulu, kodwa amathuba amathathu amakhulu avalelwe unozinti we-Fluminense uFabio emizuzwini eyishumi yokuqala.
ISundowns izohamba ngokuziqhenya, kodwa nobuhlungu ngesikhathi esisodwa.
IMamelodi Sundowns ikwenze konke kodwa yahluleka emdlalweni wayo we-Club World Cup ne-Fluminense.
Umdlalo uphele ngo 0-0, kodwa aMasandawana abedinga ukunqoba ukuze afinyelele ku-last 16.
Baqale ngomfugho enkundleni yezemidlalo i-Hard Rock eMiami. Ngemizuzu eyishumi nje, uLucas Ribeiro, uDivine Lunga noTashreeq Matthews bonke basondele ekushayeni amagoli. Kodwa unozinti we-Fluminense uFábio ubagcine ngaphandle wabavimba.
ULucas udlule abadlali basemuva ukuze azame ukushaya igoli, kodwa uFábio ubeselindele. Unikeze uMatthews,
Kodwa u-Fábio waphuma egijima wamuvimba. ULunga uzame ukushaya igoli, kodwa unozinti wase-Brazil walibamba ibhola.
Ngemuva kwalokho, iSundowns ayikwazanga ukuqhubeka nengcindezi. I-Fluminense yaqina, kwathi ngomzuzu ka-57, umgadli uGermán Cano washaya ipali.
Umqeqeshi weSundowns, uMiguel Cardoso, uzamile ukulungisa izinto, wafaka uPeter Shalulile no-Arthur Sales. Uphinde wakhipha uTeboho Mokoena, obevele enekhadi eliphuzi futhi ezibeka engcupheni yokuthola elibomvu.
Naphezu kwezinguquko, i-Fluminense ibizimisele kakhulu iSundowns ibingenayo indlela yokudlula.
Ngemuva kokuphusha i-Borussia Dortmund phambilini kulo mqhudelwano, iSundowns ikhothame ngokuziqhenya, kodwa obuhambisana nobuhlungu.
Esithombeni esingenhla: IMamelodi Sundowns.
Umthombo wesithombe: @Masandawana