Dylan Bettencourt
Ukudayiswa kweqembu lebhola lezinyawo i-Chelsea ngo-R83 billion sekufike esiphethweni kulandela ukugunyazwa i-Premier League kanye nohulumeni wase-England.
Isivumelwano singaphothulwa ngemuva kokuthi owayengumnikazi wayo uRoman Abramovich evumelana ngemibandela yesakhiwo sokudayiswa esiqinisekisa ukuthi akahlomuli ngokwezimali.
UNadine Dorries unobhala wezamasiko uthe uhulumeni wase-England ukhiphe ilayisense ngoLwesibili ebusuku evumela ukudayiswa kwe-Chelsea.
Cishe emasontweni amabili ngemuva kwesivumelwano phakathi kweqembu ne-American Todd Boehly’s consortium iqembu manje lizongena enkathini entsha.
Ngemuva kokuhlasela kwe-Russia e-Ukraine ngomhlaka-24 kuNhlolanja u-oligarch Abramovich wajeziswa ngenxa yobudlelwano bakhe noMengameli uVladimir Putin.
Uhulumeni wayefuna ukuqinisekisa ukuthi lo mphathi akazuzi enye inzuzo eqenjini, kodwa unswinyo lwabeka imingcele eminingana eqenjini lase-London elingakwazi ukukhiqiza imali.
Ukugunyazwa kukahulumeni kwabambezeleka kulandela ingxabano mayelana nesikweletu esinikezwe i-Chelsea enkampanini exhumene no-Abramovich.
Ngemuva kokucaciswa ukuthi u-Abramovich ngeke azuze ohlelweni lokubuyisela isivumelwano sivunyelwe ukuthi sicutshungulwe.
Ukudayiswa manje sekuzongena ohlelweni oluyizinyathelo ezimbili lapho kuzongena khona u-R49 billion kwi-akhawunti ye-escrow kuze kube uhulumeni uyaneliseka ukuthi izimali zizoya enhlanganweni yabahlukumezekile e-Ukraine.
Inhlangano esiza abantulayo izokhethwa nguhulumeni.
“Ngemuva kokunikezwa unswinyo uRoman Abramovich uhulumeni usebenze kanzima ukuqinisekisa ukuthi iqembu le-Chelsea liyakwazi ukuqhubeka nokudlala ibhola,” kusho isitatimende sikahulumeni esicashunwe kwi-Guardian.
“Kodwa lokhu bekucacile ukuthi ikusasa leqembu lesikhathi eside lingavikeleka kuphela ngaphansi komnikazi omusha.”
Ngemuva kweminyaka ecishe ibe ngamashumi amabili engumnikazi we-Chelsea u-Abramovich uzonikezela iqembu eqenjini le-Boehly ezinsukwini ezizayo.
Umthombo wesithombe: @Eurosport
.
