Celani Sikhakhane
Ngemuva kokuchitha amashumi eminyaka esebenzela amaphoyisa, ontanga kanye nozakwabo bakaRoshan Banawo babecabanga ukuthi ukaputeni wamaphoyisa kwase kuyisikhathi sokuthi athathe umhlalaphansi.
Nokho, ngesikhathi ephuma ehhovisini lakhe eliseNkantolo yeMantshi e-Dundee, abahlanza iNkantolo bathole ukushaqeka ngesikhathi bethola ugebhezi lwekhanda lomuntu lufihlwe ngaphakathi kwebhakede kwikhabhinethi yamafayela.
UBanawo wake waduma emhlabeni wonke ngaphambilini ngokwenza umsebenzi wakhe. Ngonyaka ka-1990, umphenyi wangaleso sikhathi wanconywa njengeqhawe ngokuhola uphenyo lokubulala okwakwenziwa abalimi abamhlophe uPiet Henning, umfowabo ka-Eiker Henning kanye noyise uZiet Henning.
UPiet watholwa enecala lokubulala nokunquma amakhanda abasebenzi ababili basemapulazini abamnyama, u-Ernest Mkhize noSipho Mabaso, endaweni yokucima ukoma bephuzile ngoNhlangulana ngonyaka ka-1996.
Kubikwa ukuthi washayisa uMkhize ngeveni lakhe ekhanda ngaphambi kokuba amnqume ikhanda ngecala lokumbiza ngegama lakhe elithi “Piet” esikhundleni sokuthi “Baas”.
UPiet wabe esebuyela kwizoso waqhubeka nomcimbi. Nokho, kungakapheli sikhathi, waqala ukushaya uMabaso nomunye umlimi maqede wamklinya washona. UMabaso wanqunywa ikhanda kwathi abasebenzi ababili basemapulazini bangcwatshwa emathuneni asobala.
UBanawo, owaduma kakhulu ngokunqoba leli cala elafaka uPiet Mabaso eNkantolo yezoBulungiswa, kukholakala ukuthi wayegcine olunye ugebhezi lwekhanda lwabashonile.
Ngokombiko wephephandaba lendawo i-The Northern Natal, amaphoyisa aphenya ngalolu daba ngemuva kokutholakala kogebhezi lwekhanda kule nyanga.
Umphathi wabaseshi e-Dundee, uLieutenant Colonel Victor Mpungose, utshele iphephandaba ukuthi baphenya icala futhi ugebhezi luthunyelwe ePitoli ukuze kuhlaziywe ngalo kutholakale ukuthi ugebhezi olukabani.
UPiet wagwetshwa iminyaka engu-30 ebhadla ejele ngonyaka ka-1999. Waphinde walahlwa icala lokubulala uSibusiso Sibisi ngonyaka ka-1996.
Okungajwayelekile ukuthi uyise uZiet wagwetshwa iminyaka engu-25 ebhadla ejele ngoMandulo 2000 ngokuqasha inkabi ukuba abulale ufakazi wombuso owayefakaza ngendodana yakhe.
Umsolwa, uGerard Opperman, ubikele amaphoyisa, kwaholela ekuboshweni kukaZiet.
Umfowabo kaPiet, u-Eiker Henning, naye wagwetshwa iminyaka engu-25 ebhadla ejele ngokubulala isisebenzi esimnyama.
Amacala ase-Henning adalule udlame olunyantisayo kanye nobandlululo olushaqisayo abasebenzi basemapulazini abamnyama ababhekene nalo ezandleni zabalimi abamhlophe, futhi uBanawo wanconywa ngokuletha laba besilisa enkantolo.
Ikhansela laseNdumeni uXolani Msezana utshele i-Scrolla.Africa ukuthi bashaqekile ukuzwa izindaba zogebhezi ehhovisi likaBanawo.
“UBanawo simazi njengekhehla lamaphoyisa lapha e-Dundee kodwa kuyasithusa lokhu. Kazi ubenzani ngempela ngogebhezi lomuntu,” kusho uMsezana.