Intatheli yeScrolla
Abashayeli baseGoli sebejwayele ukubona izinto ezingasile emgwaqeni.
Kodwa bambalwa abebezilungiselele lokho abakubone ngoLwesine ekuseni ngesikhathi bebona intshe igijima eduze kwesiminyaminya sasekuseni kuWilliam Nicol Drive.
Kusabalale ividiyo yale nyoni ezinkundleni zokuxhumana.
Nakuba izintshe zidume ngokuba iziwula, lena ibihlakaniphe ngokwanele ukuthi ihlale emzileni wayo emgqeni ophakathi nendawo futhi igweme ukudala ingozi emgwaqeni kubashayeli baseGoli.
Intshe iyinyoni egijima ngesivinini kakhulu emhlabeni ngakho kumele ibonge ukuthi amakhamera ejubane aseGoli aphuke wonke.
Khonamanjalo, abe-SPCA e-Randburg bathungatha lesi silwane esidukile.
Mhlawumbe akekho ozothola le nyoni ngoba igxilise ikhanda layo enhlabathini.