Kabelo Tlhabanelo
UMoses Moalusi usulile esikhundleni ngemuva kwevidiyo yakhe yocansi- ividiyo ayiqopha yena – yasabalala.
Kule vidiyo lo wesifazane ubukeka ethukile kodwa akasiphikisi lesi senzo.
UMoalusi, uSomlomo we-ANC esifundeni se-ZF Mgcawu e-Upington, uthe ividiyo emuveza enza ucansi nomlingani wakhe yebiwe futhi uvumile ukwehla esikhundleni sakhe.
Le vidiyo icasule abanye abahlali endaweni.
UJan Smith ohlala e-Upington uthe le vidiyo ikhombisa lokhu okuthandwa abaholi kakhulu.
“Lokhu kungubufakazi bokuthi siholwa ngabantu abafuna ukuzuza bona bodwa. Abakucabangayo ucansi nokuntshontsha imali,” uyasho.
“Ngifuna ukubona intuthuko endaweni. Ngifuna ukubabona belwa nokuswelekala kwemisebenzi nobugebengu futhi benze okuthile ngokulethwa kwezidingo.”
UNobhala we-ANC e-Northern Cape uDeshi Ngxanga uthe bayakwamukela ukusula kwakhe esikhundleni.
“I-ANC ibone kufanele ukuthi imumise okwesikhashana emsebenzini ngokuhambisana noMthethosisekelo we-ANC,” kusho uNgxanga.
Uthe i-ANC iyasigxeka lesi sehlakalo ikakhulukazi llngoba izwe libhekene ne-GBV.
Abakwa-Scrolla.Africa abakwazanga ukufinyelela kuMoalusi. Ekhasini lakhe lakuFacebook uthe kumphathe kabi ukusabalala kwale vidiyo.
“Le vidiyo yaqoshwa yimi ngesikhathi somcimbi wangasese nomlingani wami endlini yami futhi yayiyenzelwanga umphakathi. Njengoba kubonakala kule vidiyo umlingani wami wavuma futhi wayekwazi kahle okwakwenzeka,” uyasho.
Uthe kukhona owantshontsha le vidiyo ekhabethe lakhe endlini yakhe ngesikhathi eyilungisa.
“Njengomndeni siphatheke kabi ngalesi senzo esingekho emthethweni futhi sinomuzwa wokuthi ilungelo lethu lokuba nemfihlo liphuliwe.”
Umthombo wesithombe: Facebook