Lubhalwe nguKarabo Rammutla
Kubulawe iphoyisa lomgwaqo eMpumalanga ngesikhathi lizithokozisa nowesifazane okuqhamuke abahlaseli ababili bacosha isibhamu salo phansi balidubula lashona.
NgoMgqibelo ntambama iphoyisa lomgwaqo belipake i-Ford Ranger yalo emhlophe ehlathini eliphakathi kwe-Hazyview ne-Graskop.
UJudas Chiloane oneminyaka engu-60 ubudala ukhumule umfaniswano wasemsebenzini elungiselela ukuzithokozisa nomngane wesifazane ongadalulwanga.
Kodwa bekungelona usuku lwakhe. UChiloane nalo wesifazane kuthiwa baphazanyiswe ngabasolwa ababili abangaziwa. Omunye wabo uthathe isibhamu sephoyisa kumfaniswano walo obuphansi walidubula.
Iphoyisa ebelilimele lizamile ukushayela iveni yalo, kodwa lashona endaweni eqhele ngamamitha ambalwa endaweni yesigameko. Lo wesifazane uphume engenamyocu wabe esebiza amaphoyisa.
Abesilisa ababili abaneminyaka engu-35 ubudala, baboshwe mayelana necala lokubulala uChiloane ngesikhathi somkhankaso woKlebe ngase-Bushbuckridge ngoMsombuluko, ngokusho kokhulumela amaphoyisa uKaputeni Dineo Sekgotodi.
“Amaphoyisa ase-Mpumalanga alandele yonke imininingwane etholwe ngumphakathi, okuholele ekutheni laba bobabili baboshwe ukuze baphekwe ngemibuzo,” kusho uSekgotodi. “Olunye uphenyo luholele ithimba komunye wemizi yomsolwa, nokuyilapho kuphenywe khona.
“Kutholwe isibhamu esine-serial number sashaqwa ukuze kuqhutshekwe nophenyo.” Abasolwa ababili bazovela eNkantolo yeMantshi yase-White River ngoLwesithathu.”
Isithombe esingenhla: Kutholwe isibhamu kulabo abasolwa ngokubulala iphoyisa lomgwaqo eMpumalanga
Umthombo wesithombe: SAPS Mpumalanga