Kamogelo Muvhenzhe
Kushone owesifazane ngesikhathi isihlahla siwela phezu komjondolo wakhe ngesikhathi kuduma izulu elishaye e-Phalaborwa ngempelasonto.
UTintswalo Mbiza oneminyaka engama-21, ubelele emjondolo wakhe nomyeni wakhe nendodakazi yakhe ngoMgqibelo ebusuku ngesikhathi imimoya enamandla yesiphepho idala ukuthi kuwe isihlahla.
Lezi zithandani zakha umjondolo wazo eduze kwesihlahla eminyakeni embalwa edlule.
Umyeni wakhe uChicco Khoza utshele i-Scrolla.Africa ukuthi uvuswe ngumsindo omkhulu ngalolo suku olubi lwangoMgqibelo.
“Ngesikhathi ngivula amehlo, unkosikazi wami ubebhajwe ngaphansi kwesihlahla futhi enganyakazi, indodakazi yethu ibikhala futhi yopha. Ngizamile ukudonsa uTintswalo ngaphansi kwesihlahla ebesiwile kodwa wanganyakaza,” kusho uKhoza, wasesigodini sase-Majeje.
Uthathe indodakazi yabo enezinyanga ezintathu wagijimela komakhelwane eyofuna usizo. Kodwa bese kushaye isikhathi kumkakhe.
“Namanje angazi ukuthi mina nendodakazi yethu sisinde kanjani kuleso sehlakalo ngoba besilele embhedeni owodwa. Ngemuva kwakho konke imvula ibiqhubeka ina kakhulu nemimoya enamandla, futhi bekufanele ngidlule ezimvuleni ezinkulu ngiyocela usizo,” esho.
Okhulumela umasipala wesifunda sase-Mopani, u-Odas Ngobeni uthe zingaphezu kwezingama-50 izindlu ezicekelwe phansi isiphepho.
“Sisebenzisana kakhulu nawo wonke umuntu kubalwa noMnyango wezokuThuthukiswa koMphakathi ukuqinisekisa ukuthi imindeni iyaluthola uxhaso eludingayo ngalesi sikhathi esinzima,” esho.
IMeya kamasipala wesifunda sase-Mopani, uPule Shayi, udlulise amazwi enduduzo emndenini wawufisela ukuthi ingane elimele esesibhedlela ilulame ngokushesha.