Lubhalwe ngu-Everson Luhanga
Kusolakala ukuthi isihlabani sebhola uShawn Mogaila sibaleke endaweni yesigameko ngemuva kwengozi ebulale intombazane eneminyaka engu-9 ubudala eTembisa ngoLwesithathu ekuseni.
Isihlabani sebhola saseNingizimu Afrika kusolwa ukuthi sibaleke endaweni yesigameko ngemuva kwengozi ebulale intombazane eneminyaka engu-9 ubudala eTembisa ngoLwesithathu ekuseni.
UMogaila, odlalela iSekhukhune United, uzinikele emaphoyiseni ase-Rabie Ridge ngemuva kokubandakanyeka engozini eyenzeke ku-Andrew Mapheto Drive.
Unina wengane nendodakazi yakhe eneminyaka engu-13 ubudala, abebevaleleke emotweni yabo, bahlengwe baphuthunyiswa ezikhungweni zezokwelapha eziseduze.
Kusolwa ukuthi uShawn (29) ubalekile endaweni yesigameko.
Okhulumela uMnyango wamaPhoyisa kaMasipala waseKurhuleni uThabiso Makgato uthe ngesikhathi befika endaweni yesigameko bathole umama nengane yakhe eneminyaka engu-13 ubudala besavaleleke emotweni yabo omunye umshayeli engekho endaweni yesigameko.
Ingozi yenzeke ngezithuba zabo-07:30 emgwaqeni u-Andrew Mapheto eTembisa.
“Sithole amabhodlela amane otshwala iDon Julio. Siphinde sathola impushana, esisola ukuthi kungaba yi-cocaine nezinye izinto ezifakwe insangu emotweni yakhe,” kusho uMakgato.
“Umshayeli wesifazane ubehambisa indodakazi yakhe eneminyaka engu-9 ubudala. Ingane yashona ngenxa yokulimala. Enye indodakazi, (13) ilimele kanzima yaphuthunyiswa esibhedlela iTembisa Tertiary Hospital.”
Wengeze ngokuthi icala lokubulala ngokungenhloso, ukushayela budedengu kanye nokubaleka endaweni yengozi livuliwe esiteshini samaphoyisa eTembisa South.
Esithombeni esingenhla: Izimoto ezishayelwa uShawn Mogaila kanye nomndeni oshonelwe ingane yawo eneminyaka eyisishiyagalolunye.
Umthombo: Sithunyelwe