Lubhalwe nguLucky Vince Pienaar
I-Ellis Park ibingagcwele kakhulu ngoMgqibelo. Nokho ababukeli bebezama ukungena enkundleni ngemuva kwemizuzu uqalile umdlalo.
Okokuqala ngqa bekunezihlwele ezininganaa e-Ellis Park ngoMgqibelo emdlalweni we-Jukskei derby phakathi kwamaLions namaBulls. Kodwa lokho akusho ukuthi i-Ellis Park ibigcwele phama abalandeli bebhola lombhoxo.
Izibukeli eziningi ngosuku obekushisa ilanga likhipha umkhovu etsheni bezifuna indawo yokukhosela emthunzini ohlangothini olusentshonalanga yenkundla zashiya enye ingxeye ingenamuntu.
Izibalo zabasuke bekhona azishicilelwa ngokusobala emidlalweni yase-Ellis Park, kodwa inkundla enezihlalo ezingu-62,000 ibingeke igcwale ngo-10%. Futhi uma lokho kuzwakala njengenani elincane lababukeli, khumbula ukuthi baningi kakhulu kunalabo aseke babonwa kamuva nje enkundleni.
Singacabanga ukuthi bonke ababukeli bamukelwa ngezandla ezimhlophe enkundleni, kodwa ababukeli abaningi bashiwe dengwane ngaphandle kwama-turnstiles.
Ngenhlanhla esithombeni esihlinzekiwe, kuyacaca ukuthi abalandeli bebhola lombhoxo banesineke. Bekungekho ukududulana noma abantu abafuna kubona imenenja.
Umuntu uyazibuza ukuthi bekuzokwenzekani uma , isixuku sezibukeli ezingu-20,000 ngokungazelelwe sinqume ukuza enkundleni yomdlalo.
I-Ellis Park inesithombe isingesihle. Ngokungangabazeki ezokuphepha izona eziyinkinga. Enye yezinkinga ukuthi kuyingozi ngaphandle kwenkundla kanti abaphathi bebelokhu bemile kwelokuthi le nkinga kumele isingathwe ngumasipala yize bekwazi ukuqinisa ezokuvikela uma kunemidlalo emikhulu l.
Ngakolunye uhlangothi kwenye i-derby yangoMgqibelo, ababukeli ababalelwa ku-17 000 baye enkundleni eKings Park, eThekwini ngesikhathi amaSharks edlala namaStormers. Bekungagcwele kakhulu bekusele kancane ukuthi kugcwale.
Enkundleni abadlali bamaLions kuningi asebekwenzile ukuphakamisa umdlalo wabo nokuthola abantu abazobukela. Mhlawumbe abaphathi bangathola izindlela ezintsha zokuletha abantu enkundleni. Ukuthi lezo zindlela zingaba yini lowo umbuzo onzima, kodwa leso isixazululo okufanele bathole.
Isithombe esingenhla: Ababukeli abaningi abebelinde ukungena e-Ellis Park ngemuva kwemizuzu umdlalo uqalile!
Umthombo wesithombe: Cobus Bester/Supplied