Menzi Magubane
Kulindeleke ukuthi iqhubeke impi phakathi kwe-Kaizer Chiefs ne-PSL ngemuva kokuthi leli qembu lithweswe icala lokuqoka abadlali ababili ukuthi badlale imidlalo yeligi.
Umshushisi we-PSL uZola Majavu ukuqinisekisile ukuthi abadlali be-Chiefs u-Aden Tristan McCarthy noMduduzi Shabalala babengabhaliswanga ngendlela efanele emdlalweni owawukhona we-Chiefs ne-Sekhukhune United ngomhlaka-12 kuZibandlela nyakenye.
Bobabili uMajavu noMcCarthy babengakaze badlale ngesikhathi i-Chiefs iwina ngamagoli amabili eqandeni enkundleni yase-FNB.
Leli qembu laseGoli libhekene nokuphucwa amaphuzu amathathu.
“I-Kaizer Chiefs ibekwe icala ngokufaka abadlali ababengabhaliswanga ngesikhathi bedlala ne-Sekhukhune FC,” kusho uMajavu.
Umshushisi wengeze ngokuthi laba badlali ababhalisiwe kwi-DStv Premiership.
“Babhaliswe ngezinhloso ze-reserve League okuyikhona okuyisisekelo sezinsolo ababhekene nazo njengamanje,” kusho uMajavu.
Udaba luzolalelwa ngoLwesine.
Akukhona okokuqala kule sizini i-Chiefs ithweswa icala i-PSL. Ekuqaleni kukaZibandlela i-Chiefs ihlulekile ukuhlonipha imidlalo emibili yeligi ngesikhathi kumele ibhekane ne-Cape Town City kanye ne-Golden Arrows ngemuva kokubheduka kwe-Covid-19 eqenjini.
I-Chiefs ibekwe icala i-PSL DC kanti amaphuzu ayisithupha bekufanele iphucwe.
Amakhosi nokho adlulisele udaba lwawo kwi-Safa kuNazeer Cassim oxazulule elinye lamacala abo elivune bona ngomhlaka-18 kuNdasa njengoba bengayidlalanga imidlalo yabo ne-City kanye ne-Arrows.
Nokho, isikhulu se-PSL sithathe isinqumo somxazululi sasidlulisela phambili ukuthi sibuyekezwa eNkantolo eNkulu yase-South Gauteng. Kuze kube manje alukho usuku olubekiwe lokuya eNkantolo nokuyinto okufanele i-PSL ikhathazeke ngayo njengoba i-DStv Premiership izophela emasontweni ayisithupha.
Umthombo wesithombe: @SoccerLaduma
.
